Ökunámið

Í nútíma samfélagi velja flestir að hafa þau réttindi að aka bifreið. Þessum réttindum fylgir jafnframt mikil ábyrgð þar sem akstur er ekki hættulaus. Allt of margir hafa lent í alvarlegum slysum og árlega látast margir af völdum umferðarslysa hérlendis. Mikilvægt er því að taka ökunámið alvarlega og búa sig sem best undir aksturinn.

Til þess að öðlast þennan rétt þarf viðkomandi að hafa staðist ökupróf og vera orðinn 17 ára gamall.

Ökunám er tvískipt

Verklegt nám
Flestir fara þá leið að byrja námið eftir að hafa náð 16 ára aldri með því að hefja formlegt nám hjá ökukennara. Byrjað er á því að taka verklega kennslu á bilinu 10-12 tíma. Þegar viðkomandi hefur náð tilskilinni færni er hægt að sækja um leyfi til æfingaraksturs en jafnframt þarf að hefja bóklega námið. Leiðbeinandi nemandans þarf að hafa gild ökuréttindi, vera að lágmarki 24 ára gamall og hafa að baki 5 ára akstursreynslu. Ökukennari aðstoðar við að ganga frá tilskildum pappírum og leyfum. Eftir að æfingarakstri er lokið eru teknir nokkrir verklegir kennslutímar til viðbótar og lokaundirbúningur þá hafinn fyrir verklega prófið. Að lágmarki verður að ljúka 16 tíma verklegri kennslu.

Bóklegt nám
Bóklega náminu er skipt í tvo hluta. Fyrri hlutinn varðar almenna þekkingu á umferðarreglum, umferðarmerkjum og öðru sem nauðsynlegt er að hafa þekkingu á þegar æfingarakstur er hafinn. Seinni hlutinn er síðan enn víðtækari fræðsla og undirbúningur. Eftir bóklega námið þarf að taka staðlað skriflegt ökupróf sem tekið er hjá Frumherja.

Allar frekari upplýsingar um námið eru fúslega veittar.