Allraheilagramessa 2008, Stykkishólmur

 

            Þetta er hátíð mannkyns sem gjört hefur verið guðdómlegt. Þar fagna allir þeir sem játa kaþólska trú því við sögu koma allir heilagir allra þjóða og allra tíma. Guðdómurinn hefur útvalið hann eða hana sem verkfæri starfs síns og tekið þau til sín. Sérhver kristinn maður ber í sér sæði og rót heilagleikans fyrir skírn sína: hann hefur dáið með Kristi og risið upp með honum á ný.

            Vera kann að aumkunarverður líkami hans hafi dáið undir sáramerkjum píslarvættis en sál hans var hrein og hann var Guði velþóknanlegur. Siðferðileg fullkomnun ber með sér einstaklingsbundna fegurð eða yfirnáttúrlega siðferðilega fullkomnun sem er stöðug og hetjuleg þátttaka í sælu og dýrð Guðs en hann hefur veitt líkingu hennar til hinna heilögu. .

            „Blessaður sé Guð fyrir engla sína og dýrlinga“. Sumir englarnir óhlýðnuðust Guði á skelfilegan hátt en stöðugleiki hinna  varð fyrir frelsi og gerðist með fullri vitund þeirra og vilja, og án þessa mannlega eiginleika sem vill draga allt á langinn og skilyrða. Það hefði enginn engill getað gert, hans viðbrögð voru snögg og afgerandi.

            En á þessari jörðu hafa hinir heilögu vottað Guði fullkomna hlýðni sína og samt fylgdi þessi upphafning þeirra afar mannlegu eðli þeirra. Það má meðal annars segja um 81 árs gamlan píslarvott ensku siðbreytingarinnar, hl. John Kemble, sem bað um að fá að reykja síðustu pípuna áður en hann var tekinn af lífi á kvalafullan hátt í Hereford árið 1680. Honum var veitt þessi ósk og hann naut pípunnar vel.

            Allir heilagir í þessu lífi vænast sælunnar á þann hátt sem hefur samrýmst þeim eiginleikum sem Guð hefur gefið þeim. Fyrir það hafa þeir verið algjörlega stöðugir í Guði, þekking þeirra verið óbifanleg og kærleikurinn sömuleiðis. Fordæmi þeirra dregur okkur að þeim með ósegjanlegri þrá í guðdómlegum kærleika sem er ósíngjarn og óbrjótanlegur. Því skulum við íhuga í dag þá sem hafa laðað okkur að sér á þennan hátt. Þetta er persónuleg náð sem flæðir til okkar af þeim náðarlindum sem þeir drukku af. Megi þeir umfaðma okkur í nærveru sinni í óspillanlegri gleði; mættum við finna Guð í þeim! Amen.