Uppstigningardagur 2010, Stykkishólmur

      Guðspjall dagsins um uppstigninguna er frá Lúkasi komið og þótt stutt sé er hún þó nákvæmust allra þriggja frásagnanna um stað hennar og tíma. Frásögn Matteusar endar á fundi þeirra á fjallinu í Galíleu og í frásögn Markúsar er vikið frá því er Jesús birtist lærisveinum bak við luktar dyr þar sem lærisveinarnir sátu til borðs og fullyrt að hann hafi verið uppnuminn til himins, en staðarins þó ekki getið. En í Lúkasarguðspjalli er sagt að þetta hafi gerst á Olíufjallinu í nánd við Betaníu. Konstantínus keisari og Helena móðir hans fylgdu erfðavenjunni og létu girða af sérstakt þaklaust svæði þar sem talið var að hann hefði verið numinn upp til himna. Ég held að það sé notað sem kirkja. Lúkas hlýtur að hafa rannsakað málið fyrst hann var svo nákvæmur í frásögn sinni. Hann hefur kannað ævisagnabrot Drottins vors og rætt við sjónarvotta. Hann fullyrðir beinlínis að hann hafi verið upp numinn til himins frá þeim og því hafa heimildarmenn hans borið vitni án nokkurs vafa.

      Tvennt er einnig athyglisvert við hinar frásagnirnar.

      Hið  fyrra er að hann hvarf frá þeim meðan hann var að blessa þá. Ákveðin og eindregin blessun vitnar um hið nána samband sem var á milli postulanna og Drottins þeirra. Lúkas lætur sem förin frá jörðu til himna ætti ekki að valda neinum vandræðum. Hann var þarna tekinn frá þeim. Við kynnum að álíta að erfitt gæti verið að lýsa í orðum hinni mannlegu hlið en hann segir frá þessu í þátíð og nær þar með efnislega öllu því sem lýsa þarf.

      Annað  er það að lærisveinarnir komu niður af Olíufjallinu og héldu þegar áleiðis til Jerúsalem, með miklum fögnuði og voru stöðugt í helgidóminum og lofuðu Guð. Þessi gleði var í eftirvæntingu komu Heilags anda yfir þá ásamt Maríu á hvítasunnu. Þessir atburðir tengdust og allt það sem fylgdi í kjölfar nærveru Heilags anda. Jesús fór frá postulum sínum um leið og hann var numinn upp til himnesks fagnaðar en lærisveinarnir yfirgáfu brottfararstaðinn fullir gleði yfir páskasigri hans og allri þjónustu hans á jörðinni. Þessi gleði stóð uns þeir tóku á móti Heilögum anda á hvítasunnu en með því tengdust þeir gleði himinsins í leyndardómi Krists en hann stofnaði þennan leyndardóm í sakramentinu á jörðu. Þessi upprisa frá jörðu vísar til hinnar himnesku gleði sem stafar frá nærveru hans á himnum og umlukti nú allt líf þeirra með óbreytanlegri og ævarandi blessun. Amen.