Uppskriftir.
Ég hef gaman af eldamennsku. Hérna eru nokkrar af uppáhaldsuppskriftunum mínum ef verða mætti að þær vektu áhuga einhverra til frekari dáða í matargerðarlist. Hér er t.d. ein sem gæti dugað vel ef þið viljið vita hvort einhver elskar ykkur í raun og veru.
Venjuleg uppskrift af grjónagraut. Svo er bætt út í grautinn:
- 1 flaska lýsi
- 1-2 kg af salt eftir smekk
- 1 hnefi sag eða fjörusandur
- 1-2 box af pipar
- kanill
- Ef þú ert kona rakar þú fótleggina og stráir hárunum út á en karlmenn geta notað skegghár. Þetta á sér í lagi við ef viðkomandi persóna hefur sagst geta étið þig.
- Setjist og horfið vingjarnleg og brosandi á gestinn borða. Manneskja sem borðar þetta án þess að mögla elskar ykkur áreiðanlega í alvöru.
Feiminn hafragrautur
- Þessa uppskrift fékk ég frá fjögurra ára konu sem heitir Aldís Inga. Maður setur haframjöl á disk, mjólk útá og stráir soldið sykur yfir.
- Ég veit ekki af hverju þetta er kallað feiminn hafragrautur. Sennilega er það vegna þess að þessi blanda þorir ekki alveg að vera grautur. En prófaðu þessa ef þér líkar ekki uppskriftin hér fyrir ofan.
Kjúklingur í salthjúp.
Þessi er í alvöru. Ég er ekki að grínast ég elda þetta sjálfur svona 1-2svar á ári.
- 1 stk kjúklingur
- engiferrót
- 3-4 kíló salt.
Hreinsið og þvoið kjúklinginn. Skrælið engiferrótina og setjið hana inn í kjúklinginn. Setjið salt í botninn á stóru eldföstu móti með loki og kjúklinginn þar ofan í. Grafið kjúklinginn í saltinu svo hvergi sjáist í hann. Hitið ofn í 175 gráður C. og bakið í 90 mínútur. Berið fram með hverju sem ykkur lystir.
Silungur með hnetum og rúsínum.
- Silungur, stór eða lítill eða jafnvel nokkrir silungar.
- Lárviðarlauf
- Rúsínur
- Salthnetur
- Edik
- Sykur
- Hveiti og smjörlíki eða matarolía
- Setjið rúsínur, hnetur, lárviðarlauf, vatn, sykur og edik eftir smekk í pott og látið sjóða svolitla stund. Síið soðið frá og setjið það aftur í pottinn, látið suðuna koma upp og setjið silunginn út í. Slökkvið undir pottinum og látið silunginn liggja í vatninu þar til hann er soðinn í gegn. Síið soðið, setjið hveitið og olíuna í pottinn og bakið upp sósu, bætið rúsínum og hnetum út í aftur, bragðbætið með ediki eða sykri eftir smekk og berið á borð. Sósuna má líka bragðbæta með sítrónusafa ef vill. Með þessu er gott að hafa nýjar kartöflur....
- Saltkjöt og baunir að mínum hætti.
Grunninn að þessari uppskrift lærði ég af Kristjáni Guðnasyni sem lengi var húsvörður hjá K.Á á Selfossi. Einhverjar viðbætur eru frá mér. Þetta er ein af þessum súpum sem engin uppskrift er til að í raun og veru, aðeins tilfinning fyrir góðri súpu.
- Saltkjöt
- Kartöflur.
- Gulrætur.
- Gular baunir
- Beikon eða saltað svínaflesk
- Hvítlauksrif
- Engiferrót
- Dill
- Leggið baunirnar í bleyti í a.m.k. sólarhring áður en þær eru eldaðar. Hellið bleytivatninu af baununum og látið svo suðuna koma upp á kjötinu, fleytið froðunni af, setjið kartöflurnar flysjaðar og baunirnar út í með kjötinu. (Ekkert kokkaskólastúss með aðskilda potta hér!) Merjið eitt hvítlauksrif út í súpuna fyrir hvert kg. af kjöti og setjið skrælda engiferrót út í líka, u.þ.b eina tommu fyrir hvert kg. af kjöti. Bragðbætið með dilli og látið sjóða í u.þ.b. 1 klst. Mikilvægt er að sía baunirnar áður en súpan er borin á borð til að gera súpuna jafnari, hita hana aftur, bæta kartöflum og öðru grænmeti út í aftur og bera á borð. Fólk sem er verulega æst í góða baunasúpu getur sett súpuna í krukku, bundið hana á bakið og farið út að skokka í svo sem hálftíma. Það eykur lystina á súpunni og gerir hana mun bragðbetri.
- Saltkjöt með soðkökum
- Þessi er gömul og þjóðleg. Hún er líka um saltkjöt. Ég lærði þessa soðkökugerð af ömmu minni.
- Saltkjöt
- Rúgmjöl
- Vatn
- Salt.
Setjið saltkjöt í pott og látið suðuna koma upp.Hnoðið saman rúgmjöli, vatni og salti og búið til kökur úr mjölinu u.þ.b. 7-8 cm í þvermál og 3-4 sm þykkar. Setjið kökurnar með kjötinu og látið sjóða í 1 klst. Berið kökurnar fram heitar með kjötinu. Þær geymast í nokkra daga og eru ágætar með smjöri bæði heitar og kaldar.
Með þessu má bæta ögn af rúgmjöli út í soðið, setja með gulrætur, rófur og kál og þá er komin súpa. Rétt er þó að aðgæta hvort soðið er of salt áður...Þessi súpa borðar sig bókstaflega sjálf og ef hún er vel heppnuð minnir bragðið á feitan kvenmann.
Njótið þessara rétta ef ykkur langar....kannski bæti ég einhverju við seinna.
Þessi er frá mágkonu minni.
Takið nætursaltað þorskflak, roðflettið það og steikið á pönnu með lauk og hvítlauk eftir smekk. Stráið karrý yfir og hellið eins og einni dós af kókoshnetumjólk á eftir og hitið.
Þú notar þessa þegar einhver í fjölskyldunni sest á kornfleksið.
- Kjúklingur eftir fjölskyldustærð
- Kornfleks
- Rjómi
- Sveppir.
Myldu kornfleksið vel. (Gott er að hafa það í pokanum á meðan og kreista hann, en gættu að því að það geta komið göt á hann) Skerðu kjúklinginn niður í hluta - eða keyptu kjúklingahluta - veltu þeim upp úr rjómanum og síðan kornfleksinu. Settu kornfleks í botninn á steikingarpotti og sveppina með, settu kjúklingahlutana með og afganginn af kornfleksinu í kringum bitana og meðfram þeim. Helltu rjómanum á eftir. (Á að giska hálfur lítri pr. hænu er heppilegt eða það sem þér finnst nóg til að kornfleksið drekki vel í sig og verði rakt í gegn.) Saltaðu eftir smekk og bakaðu við 190 gráður í 1 klst. Berðu fram með hverju sem þú vilt. Og ekki fara að setjast á kókópufsið líka, þar get ég ekki bjargað þér.
- Ég fékk þessa uppskrift á irkinu hjá stelpu í MH sem heitir Stefa.
Hátíðarfiskur fyrir 4-5
- 800gr Skötuselur (ég nota nú bara ýsu)
2 saxaðar paprikur
1 sneiddur blaðlaukur
2 saxaðir sellerístönglar (mér finnst þeir vondir og sleppi þeim alltaf)
150 gr. rifinn ostur (ég nota bara eins og mig langar)
2 dl muldar kartöfluflögur (papriku)
2 1/2 dl rjómi
4 msk hveiti
1 dl ananassafi eða hvítvín (ég nota ananassafann ;)
4 msk smjör
2 msk ólífuolía
(ertu ekki örugglega að skrifa þetta niður ??)
1-2 tsk tómatkraftur
1/4 tsk turmeric
1/4 tsk karrí
1 tsk Italian seasoning
1/2 tsk. þriðja kryddið
1 tsk salt
1/2 tsk svartur pipar
1 fiskteningur
húff....þá er hráefnið komið
Nr 1. Láta grænmetið krauma í 2 msk af smjöri þar til það verður meyrt
Nr 2. Bæta 1 msk. af hveiti (ég setti óvart 4 í gær) út í ásamt ananassafa, rjóma, tómatkrafti og örlitlu af vatni ef sósan er þykk
Nr 3. Krydda með turmeric, karrí, þriðja kryddinu, Italian seasoning og fiskteningnum
Nr 4. Láta krauma við vægan hita í nokkrar mínútur og hræra í af og til
Nr 5. Skera fiskinn í sneiðar (stendur 4 cm. ca. en ég geri bara eftir þörfum)
Nr.6 Blanda saman 3 msk af hveiti, 1 tsk. salti og 1/2 tsk pipar (atsjú)
- <Grimnir> þetta er að verða flókið en freistandi
<Stefa> aha
<Stefa> alveg eins og kynlífið .. ;)
<Stefa> hehhehe
<Grimnir> right
Nr 7. Hita á pönnu 2 msk af smjöri og 2 msk af ólífuolíu
Nr 8. velta fisknum uppúr hveitinu og steikja hann í 2-3 mín á hvorri hlið
Nr 9. Hella grænmetissósunni í eldfast mót og raða fiskbitunum ofan á
Nr 10. Mylja kartöfluflögurnar ofan á allt saman þannig að þær hylji fiskinn og ostinn þar ofan á eftir vilja
Nr 11. Bregða undir glóð í nokkrar mín... eða þangað til osturinn er bráðinn
Nr 12. Berið á borð fyrir þá sem þér þykir vænt um (...og eru ekki í megrun)
<Grimnir> frábært!
<Stefa> :)
- Á þessari slóð eru margar sniðugar uppskriftir að því hvernig á að matreiða grásleppu - og annan fisk.