Ég er fædd á Dalvík, en hef búið á höfuðborgarsvæðinu frá 6 ára aldri. Lengst af í Kópavogi. Með einu fráviki þó þ.e. við fjölskyldan bjuggum á Akureyri í ein 8 ár á árunum ´78 -´86.
Höfum auk þess búið í Reykjavík, Hafnarfirði og Kópavogi. Sem sagt öllum aðalbæjum landsins!
Síðasti flutningur átti sér stað í des. 2005, en þá minnkuðum við gömlu brýnin við okkur og fluttum frá Kópavogi til Reykjavíkur. Því fylgdi vissulega smá tregi eftir 11 ára búsetu í bernskubænum við Voginn. En okkur líst vel á að gerast því sem næst miðbæjarrottur! Kunnum einkar vel við okkur og með eindæmum þægilegt að vera í göngufæri við miðborgina.

Foreldrar mínir eru Pollý Sæmundsdóttir og Guðjón M. Kristinsson, málarameistari, þau eru bæði látin.
Ég á tvo yngri bræður þá Kristinn, hans kona er Guðrún Sveinsdóttir.Þau eiga þau tvö börn, Þóru Katrínu og Tómas Kára. Og „litli“ bróðir minn heitir Valgarður Þórir. Konan hans heitir Iðunn Magnúsdóttir og synir þeirra eru Andrés Helgi, Guðjón Heiðar og Viktor Orri.

Efri mynd: Mamma níræð í nóv. 2007
Neðri mynd: Við systkinin með henni, Valli t.v. og Kiddi t.h.

Maðurinn minn heitir Magnús Steinarsson, verkefnisstjóri hjá Vátryggingarfélagi Íslands. Við eigum eina uppkomna dóttur, Eygló Ósk. Hún er viðskiptafræðingur og stundar masternám í HR. Hún býr í Kópavogi ásamt manni sínum Helga Þór Arasyni, forstöðumanni hjá Landsbanka Íslands.
Þau eiga tvö börn, Rakel og Andra Má.
Magnús hér að ofan og Góa og Helgi fyrir neðan

Störf

Byrjaði að vinna á Bókasafni Kópavogs daginn sem safnið flutti í nýtt húsnæði að Hamraborg 6a, þ.e.í maí árið 2002. Safnahúsið er glæsileg bygging og gaman að vera þar með frá byrjun. Það starf leiddi mig í bókasafns- upplýsingatækninám, sem var afskaplega skemmtilegt. Það er eitthvað við bækur sem hefur alltaf heillað...
Áður hafði ég lengst af unnið bankastörf, eða rúm 20 ár. Auk þess að hafa komið við á lögfræðistofu og skrifstofu verkalýðsfélags.
Vann líka um 3 ár hjá Bókasafni Hafnarfjarðar.
Venti enn mínu kvæði í kross árið 2007 og sótti um starf við Leiðbeiningastöð heimilanna á Kvennaheimilinu að Hallveigarstöðum. Byrjaði þar 1. des. 2007 og gef leiðbeiningar og ráð við öllu mögulegu er varðar heimilishald, heimilisstörf og heimilistæki. Sé um heimasíðu stöðvarinnar og skrifa greinar í Húsfreyjuna auk margs annars.Leiðbeiningarstöðin hefur verið rekin af Kvenfélagasambandi Íslands síðan 1963. Sem sagt einkar fjölbreytt og skemmtilegt starf.
Það er aldrei of seint að breyta til, eina sem þarf er áhugi og einhver skammtur af áræði!

Nám

Eftir Landspróf byrjaði ég að vinna í Samvinnubankanum og fór síðan í Kvennaskólann á Blönduósi. Hann var heimavistarskóli og það að búa á heimavist er að mínu mati, ásamt náminu, mjög góður undirbúningur undir lífið. Og enn sækir maður í viskubrunninn þaðan.
Tók svo ýmis námskeið í Bankamannaskólanum meðan hann var og hét.
Hef sótt í gegnum árin hin og þessi námskeið í t.d. tungumálum og myndlist. Stundaði nám í Tölvuskóla Reykjavíkur í einn vetur, auk margs konar námskeiða sem tengdust vinnu minni í Landsbanka Íslands.
Tók mig svo til og fór í nám í Ferðamálaskólanum í Kópavogi og útskrifaðist þaðan árið 2000, af Hótel og gestamóttökubraut. Var í senn fróðlegt og mjög skemmtilegt nám.
Lauk 2ja ára námi í bókasafns- og upplýsingatækni í desember 2004. Fékk fagbréf í greininni vorið 2006. Þar var lögð áhersla á tölvuvinnu hverskonar, vefsíðugerð, myndvinnslu, fjölmiðlafræði, greinaskrif, upplýsingaleit og upplýsingalæsi.
Mín reynsla: Aldrei of seint að bæta við sig þekkingu og raunar algjör nauðsyn, ætli maður ekki að sitja eftir í okkar tæknivædda nútíma þjóðfélagi.

Aftur á forsíðu