Byrjað að nota PowerPoint

• Leið 1: PowerPoint er ræst með því að smella á starthnappinn og velja Programs - Microsoft Office og síðan PowerPoint.
• Leið 2: Smellið á PowerPoint í Office 2000 tækjaslánni eða í Office 97 tækjaslánni sem oftast er staðsett annað hvort efst til hægri á skjánum eða til hliðar hægra megin (sjá skjámynd PowerPoint 2000).

Skjámynd PowerPoint 2000

Fyrsta skjámynd PowerPoint 2000

Ný glærukynning búin til

PowerPoint býður upp á þrjár leiðir til að búa til nýja glærukynningu:

• Svokallað Stoðforrit [AutoContent Wizard] sem leiðir okkur í gegnum það þrep fyrir þrep að búa til nýja glærukynningu og gefur okkur hugmyndir í leiðinni um skipulag hennar.

• Sniðmát [Template] sem býður upp á 24 mismunandi tilbúin glæruform - öll lík og með svipað viðmót.

• Auða formið [Blank] býður upp á að búa til glærukynningu frá grunni.

• Í þessari PowerPoint kynningu verður aðaláhersla lögð á að nota Sniðmát [Template] við gerð glærukynninga.

• Veljið Template í PowerPoint samtalsglugganum (þessi samtalsgluggi er aðeins til taks þegar PowerPoint opnast í byrjun).

• Ef PowerPoint er þegar opið, veljið þá New í File valmyndinni.

• Smellið á Design flipann á New Presentation spjaldinu. Þessi flipi býður upp á nokkur fyrirfram hönnuð sniðmát [Template] - allt sem notandinn þarf að leggja til er innihaldið. Sýnishorn allra sniðmátanna koma fram í skoðunarglugganum.

• Veljið [Select] það sniðmát sem ykkur lýst best á og smellið síðan á OK hnappinn.

• Þá birtist samtalsglugginn fyrir nýja glæru [New Slide]. Smellið á þá glæruuppsetningu sem þið viljið nota og síðan á OK hnappinn.

Eftirfarandi sjálfvirk glæruform [AutoLayouts] eru venjulega notuð:

   Glæruform sem ætlað er fyrir glæru með fyrirsögn og  undirfyrirsögn.

   Glæruform sem býður upp á að áherslumerkja lista.

   Glæruform með tvískiptum áherslumerktum listum.

   Glæruform sem býður upp á að búa til og/eða bæta við myndriti á glæru.

   Glæruform sem býður upp á áherslumerktan texta og að setja mynd inn á glæruna.

Glærukynning opnuð

• Veljið File, Open.

• Smellið á drifið þar sem glærukynningin er vistuð.

• Smellið á nafn glærukynningarinnar.

• Smellið á OK.

Fimm leiðir til að skoða PowerPoint glærukynningu

• Neðst vinstra megin á skjánum eru 5 hnappar sem hver um sig tákna eina af þeim fimm mismunandi leiðum sem völ er á þegar unnið er með glærukynningar:

• Normalhamur [Normal View] (kemur með PowerPoint 2000) inniheldur þrjú svið: Yfirlitsham [Outline View], Glæruham [Slide View] og Minnisblaðaham [Notes Page View]. Hægt er að vinna við öll þessi svið á einum stað.

• Glæruhamur [Slide View] .sem við notum til að búa til og breyta einstökum glærum sem innihalda annað hvort myndir eða texta.

• Yfirlitshamur [Outline View] þar sem aðeins er hægt að vinna við texta kynningarinnar.

• Glæruröðunarhamur [Slide Sorter View] þar sem hægt er að breyta röð glæranna í kynningunni og að skilgreina tilfærslu [transisiton] frá einni glæru til annarrar.

• Minnisblaðahamur [Notes Page View] er notaður til að slá inn minnispunkta fyrir fyrirlesarann við kynninguna. Ennfremur er hægt að prenta út afrit af minnispunktunum í þessum ham.

• Glærusýningarhamur [Slide Show View] þar sem hægt er að skoða glærukynninguna á hvaða stigi sem er á meðan á gerð glærukynningarinnar stendur og að æfa væntanlega kynningu. Þessi hamur er notaður þegar kemur að endanlegri glærukynningu.

• Í þessari kynningu á PowerPoint verður aðaláherslan lögð á Glæruham [Slide View], Glæruröðunarham [Slide Sorter View] og Glærusýningarham [Slide Show View].

Glærukynningu breytt

• Um leið og búið er að velja Glæruform [AutoLayout] er hægt að byrja að slá inn texta og setja inn myndir í Glæruham [Slide View].

• Ef þið eruð ekki stödd í Glæruham [Slide View] smellið þá á hnappinn neðst á skjánum.

• Til að setja inn texta er smellt á textareitinn ("Click to add title" eða "Click to add text) birtist þá innsláttarbendillinn og er þá hægt að byrja að slá inn texta.

• Ef þið ætlið að setja inn mynd úr myndasafninu sem fylgir PowerPoint er tvísmellt á myndsvæðið ("Double click to add a clip art") á glærunni.

• Birtist þá samtalsvalmynd myndasafnsins [Microsoft Clip Gallery]. Smellið á þá mynd sem þið viljið fá á glæruna og smellið á Insert hnappinn.

Flokkað myndasafn PowerPoint 2000

• Ef þið viljið setja inn mynd annars staðar frá þá er fyrst smellt einu sinni á myndsvæðið á glærunni ykkar, þá á Insert - Picture - From File. Þegar Insert Picture samtalsglugginn birtist, veljið þá viðkomandi drif og möppu í Look In felliglugganum: smellið á viðkomandi mynd og síðan á Insert hnappinn.

• ATHUGIÐ: Ef þið hafið ekki valið Glæruform sem býður upp á texta og mynd þá er samt hægt að ná í mynd úr myndasafninu eða mynd á diski með því að smella á Picture í Insert valmyndinni.

Nýrri glæru bætt inn í glærukynningu

• Leið 1: Veljið Insert, New Slide, smellið á glæruform [AutoLayout] í samtalsglugganum fyrir nýjar glærur og smellið á OK hnappinn.

• Leið 2: Smellið á New Slide hnappinn á Standard tækjaslánni, veljið Glæruform [AutoLayout] í samtalsglugganum fyrir nýjar glærur og smellið á OK hnappinn.

Uppröðun glæra í glærukynningu breytt

• Smellið á Glæruröðunarhnappinn neðst á skjánum hjá ykkur - eruð þið þá komin í Glæruröðunarham.

• Smellið einu sinni á glæruna sem þið ætlið að færa.

• Haldið vinstri hnappi niðri og dragið völdu glæruna á nýja staðinn. Lóðrétt lína birtist þar sem glæran verður sett.

• Sleppið músarhnappnum og PowerPoint mun endurraða glærukynningunni í samræmi við breytinguna.

• Smellið á Slide View hnappinn neðst á skjánum og haldið áfram að vinna við glærukynninguna ykkar.

Glæru eytt

• Leið 1: Í Glæruham [Slide View] látið þið myndina sem þið ætlið að eyða vera á skjánum og veljið Edit - Delete Slide.

• Leið 2: Í Glæruröðunarham [Slide Sorter View] veljið [Select] þið glæruna sem þið ætlið að eyða og smellið á Edit - Delete Slide eða sláið á Delete á lyklaborðinu.

Unnið með Grunnglæru [Slide Master]

• Grunnglæran [Slide Master] gerir okkur kleift að breyta útliti svæðis á einni glæru sem um leið hefur þau áhrif að viðkomandi svæði á öllum glærum kynningarnar (nema titilglærunni) breytast að sama skapi. Auk þess er hægt að gera breytingar hvenær sem er í vinnuferlinu. Með Grunnglæru er hægt að:

• breyta texta

• bæta inn hlutum

• breyta uppsetningu

• Veljið View, Master, Slide Master.

• Slide Master er lokað með því að smella á Slide View hnappinn neðst á skjánum.

Tilfærsluatriði á milli glæra valin

• Skiptið yfir í Glæruröðunarham [Slide Sorter View].

• Veljið [Select] glæruna sem þið ætlið að setja breytinguna á.

• Smellið á Slide Transition í Slide Show valmyndinni (eða smellið á Slide Transition hnappinn ). Birtist þá Slide Transition samtalsglugginn:

• Í Effect veljið þið hvernig glærurnar eiga að birtast á skjánum (t.d. Blinds Horizontal o.s.frv.). Neðst á Effect svæðinu veljið þið hraða tilfærslunnar (hægt, meðal eða hratt). Hraðamöguleikinn býðst ekki fyrr en þið eruð búin að velja tilfærslu. Í dæminu hér fyrir ofan er valmöguleikinn grár (óvirkur) vegna þess að engin tilfærsla hefur verið valin.

• Advance svæðið gefur okkur möguleika á að ákveða hvernig glærukynningin birtist, annað hvort handvirkt með því að smella með músinni eða sjálfvirkt með því að stilla tímann. Í dæminu fyrir neðan mun glærukynningin aðeins færast á næstu glæru þegar fyrirlesarinn smellir með vinstri músarhnappi.

• Þegar velja á valmöguleika fyrir eina glæru er viðkomandi glæra valin [Selected] og smellt á Apply.

• Þegar velja á einn valmöguleika fyrir allar glærurnar er smellt á Apply to All.

• Til að skoða tilfærsluna er smellt á Glærusýningarhnappinn [Slide Show]. Sjá Glærukynning skoðuð [Viewing a Slide Show] hér fyrir neðan:

Glærukynning skoðuð

• Smellið á Glærusýningarhnappinn [Slide Show] neðst á skjánum.

• Þegar næsta glæra á að koma í ljós í glærukynningunni þá eru eftirfarandi möguleikar í boði

  • smellt með vinstri músarhnappi

  • slegið á PageDown hnappinn á lyklaborðinu

  • slegið á ör til hægri á lyklaborðinu

  • hægri-smellt á glæruna á skjánum og valið Next

• Ef við viljum fara til baka á næstu glæru þá eru eftirfarandi möguleikar í boði:

  • slegið á PageUp lykilinn á lyklaborðinu

  • slegið á ör til vinstri á lyklaborðinu

  • hægri smella á glæruna á skjánum og velja Previous

• Ef við viljum stöðva glærukynningu þá er annaðhvort:

  • slegið á Esc hnappinn á lyklaborðinu

  • eða hægri smellt á glæruna á skjánum og valið End Show

Glærukynning vistuð

• Smellið einu sinni á File valmyndina

• Veljið Save eða Save As skipunina

• Gefið glærukynningunni nafn í File Name felliglugganum

• Veljið drifið sem þið ætlið að vista glærukynninguna ykkar á. Það er gert með því að benda á örina næst Save in: felliglugganum og smella einu sinni með vinstri músarhnappi

• Smellið síðan einu sinni á Save

Glærukynning prentuð

• Smellið einu sinni á File valmyndina

• Veljið Print skipunina

• Print samtalsglugginn birtist:

• Ef þið ætlið að prenta glærukynninguna í lit takið þá hakið úr "Black & white" eða "Pure black & white" eins og gert er hér fyrir ofan. Stundum þarf að fara í Properties og velja á milli litprentunar og svart/hvítrar prentunar.

• Ef prenta á gærukynninguna í svart/hvítu - smellið þá í box "Black & white" valmöguleikans.

• Smellið á OK hnappinn

• ATHUGIÐ: Þið getið líka prentað glærukynninguna sem dreifiblað [Handouts], minnisblöð [Notes Pages] og í útlitsham [Outline View]. (Þessir valmöguleikar bjóðast í Print what: fellilistanum - sjá mynd).