Awesome Library

http://www.awesomelibrary.org/

Styrktaraðili þessa vefjar er The Evaluation and Development Institute (EDI)
Awesome Library er almenningsbókasafn og vísar á 14,000 vefsíður sem hafa verið vandlega forskoðaðar. Þar á meðal eru þeir fimm kennsluvefir sem hafa notið mestrar viðurkenningar fram að þessu. Vefurinn er mjög aðgengilegur - flokkaður í 24 flokka eftir efni og innan hvers flokks er hægt að finna ótrúlegustu hluti - jafnvel leiðbeiningar um dans skref fyrir skef! Á hverri síðu er leitarvél þar sem hægt er slá inn eitt eða tvö lykilorð og leita eftir þeim. Allar síðurnar eru með vegvísa í margar áttir og er mjög auðvelt að rata eftir þeim. Hér getur maður dvalið dögum og vikum saman án þess að tæma efnið og er það kannski eini gallinn við þennan vef - ef galla skyldi kalla - efnið er yfirþyrmandi mikið!

California Technology Assistance Project

http://ctap.k12.ca.us/index.html

Þessi vefur er rekinn af ofangreindri stofnun sem fjarmögnuð er af menntamálayfirvöldum Kaliforníu þ.á.m. California Department of Education.
Þessi vefur er mjög vel uppbyggður gagnabanki fyrir kennara. Á honum er hægt að fá alls konar hjálp bæði tæknilega og kennslufræðilega. Við nánari kynni sýnist mér hann þó höfða mest til bandarískra kennara.

The Global Schoolhouse

http://www.globalschoolhouse.com/

The Lightspan Partnership sér um rekstur The Global Schoolhouse. Sá félagsskapur byggir á aðeins einni hugmynd: Að leita leiða til að hjálpa börnum - öllum börnum - til að ná sem bestum árangri.
Mjög vandaður þjónustuvefur um allt milli himins og jarðar sem snýr að námi og kennslu. Þar með talið mjög ítarlegar leiðbeiningar um það hvernig best er að standa að því að taka tölvu- og upplýsingatækni í þjónustu sína í kennslustofunni.
Vefurinn er mjög skipulega settur upp og leiðir mann áfram á þeirri braut sem maður velur sér í upphafi og alveg til enda. Allar síður eru með vegvísi til baka eða áfram og er hægt að eyða þarna dögum og vikum saman án þess að vera búinn að skanna allan þann fróðleik sem þarna býðst á öllum mögulegum sviðum.

Kathy Schrock's Guide for Educators

http://school.discovery.com/schrockguide/

Mjög yfirgripsmikill þjónustuvefur fyrir fræðsluyfirvöld, kennara og foreldra. Minnir á Global Schoolhouse vefinn sem minnst er á hér fyrir ofan. Þar er að finna yfir 1600 flokkuð atriði með skýringum. Vefurinn er skipulega uppsettur með vegvísum aftur á bak og áfram.

Web Sites and Resourses for Teachers

http://www.csun.edu/~vceed009/

Mjög spennandi vefur rekinn af prófessorunum Dr. Vicki F. Sharp og Dr. Richard M. Sharp við California State University, Northridge sem hafa safnað saman gagnlegum vefsíðum fyrir kennara. Þær eru flokkaðar í níu flokka eftir efni og er þar að finna mjög fjölbreytt efni, s.s. um skipulag verkefna, kennsluefni, lifandi (on-line) efni, heimsóknir á söfn og heimsóknir til landa um allan heim.

The WebQuest page

http://edweb.sdsu.edu/webquest/webquest.html

Vefurinn er rekinn af Education Service Center í Texas sem aðstoðar skólayfirvöld við að bæta árangur nemenda og hæfni. Ríki, fylki og skólasjóðir bera kostnaðinn af því starfi.
Vefleiðangrar [WebQuest]voru upphaflega hannaðir árið 1995 af Bernie Dodge prófessor við Sand Diego State University og Tom March stundakennara við sama skóla sem nú starfar í Ástralíu. Í framhaldi af því samstarfi varð þessi vefur til - en þar er að finna ótrúlegt magn alls konar upplýsinga í öllum kennslugreinum þó megintilgangurinn sé að kynna þetta frábæra kennslutæki "vefleiðangra". Auk mjög nákvæmra leiðbeininga um það hvernig á að bera sig að við gerð þeirra þá fylgir aragrúi dæma um vefleiðangra sem kennarar á öllum skólastigum hafa gert. Í þeim er ekki aðeins að finna alls konar hugmyndir að vefleiðöngrum heldur ótrúlegan fjölda vefslóða sem þessir ágætu kennarar eru með í vefleiðöngrunum sínum. Sparar það ómældan tíma að fá þær svona upp í hendurnar án nokkurar fyrirhafnar. Vefurinn er mjög skipulega upp settur og á öllum síðum er vegvísir á upphafssíðu þar sem flokkun vefsins kemur augljóslega fram [sjá mynd].