Til baka

Kjötdeig (kjötfars):

Kjötdeig má búa til úr hvaða kjöti sem er, hvort heldur er nýtt eða saltað. Bezt er kjötdeig úr svína- og nautakjöti blönduðu saman og einnig ágætt úr kindakjöti. Hrossakjöt má einnig nota. Það er ekki gott að nota vorkjöt í kjötdeig. Í kjötdeig má nota þá bita af skepnunni, sem eru seigir og smáir, og sem ekki eru góðir til að steikja eða sjóða, en dágóðir í kjötdeig, þegar búið er að saxa þá. Kjötdeig er búið til þannig, að kjötið er saxað. Til þess að það verði samfelldara, er hveiti eða hveitibrauð látið saman við það. Egg er látið í til að fá lyftingu í deigið og gera það ljúffengara og meira nærandi, því að eggin hafa þann eiginleika, að loft hrærist inn í deigið, þegar það er hrært, og það loft þenst út, þegar það kemur í hitann, og lyftir þannig deiginu. Mjólk er sett í kjötdeigið til að þynna það og jafna, og kryddefni til að bæta bragðið. Sé saltkjöt notað, þarf ekki að salta deigið. Þess betra verður kjötdeigið, því oftar sem það er saxað og því betur sem það er hrært. Munið að hafa deigan klút undir skálinni, meðan kjötdeigið er hrært. Kjötdeig má bæði sjóða og steikja á margvíslegan hátt. Allt grænmeti á sérstaklega vel við kjötdeig. (Úr bókinni "Lærið að matbúa" eftir Helgu Sigurðardóttur)