Til baka

Meðferð á slátri:

Blóðið er strax sett í emalérað ílát og geymt á köldum stað, og ekki hafður hlemmur yfir. Vambirnar eru lagðar í kalt vatn. Hjarta, lifur og lungu eru aðskilin. Barkinn er tekinn af, ristur og skafinn. Gallið er tekið frá lifrinni (gætið þess, að sprengja það ekki). Lifrin og nýrun eru notuð í lifrarpylsu eða steik. Hjartað er notað í lundabagga eða steikt. Lungum eru stundum soðin og súrsuð, séu þau af ungri skepnu, annars er þeim fleygt. Barkinn er soðinn og súrsaður. Allur mör er tekinn frá innyflunum og notaður í slátrið. Sé óþarflega mikill mör, er hann bræddur í tólg. Að hreinsa vambir: Hægt er hreinsa (kalóna) vambirnar á tvennan hátt: Dýfa þeim ofan í heitt vatn og skafa þær vel með hníf, á fjöl, þar til þær eru hvítar. Hin aðferðin er þannig, að slökkt kalk er hrært út í köldu vatni og vambirnar lagðar þar í, þar til hægt er að strjúka óhreinindin af þeim. Vambirnar látnar í kalt vatn, og þvegnar vel utan og innan úr mörgum vötnum. Þá er vömbin sniðin í 4-6 keppi, sem saumaðir eru með mjúkum þræði. Einnig er saumað fyrir vélindisopið. Um leið og vömbin er hreinsuð er vélindið skafið. Blóðmör - uppskrift Slátursúpa - uppskrift Lifrarpylsa - uppskrift (Úr bókinni "Lærið að matbúa" eftir Helgu Sigurðardóttur)