Ég hef árum saman safnað mataruppskriftum - og safnað og safnað og safnað - af taumlausri græðgi og les þær eins og hvern
annan skemmtilestur en þetta er ættgengur andskoti sem betur fer svo ég get ekkert að þessu gert eða þannig.
Svo tek ég annað veifið svona "köst" að prófa nýjar uppskriftir, jafnvel dag eftir dag... en svo vill brenna við að ég steingleymi að
nota góða uppskrift aftur, eða hreinlega hafi ekki hugmynd um hvar ég fann hana, svo mér datt svona í hug að
ekki væri galið að setja þær uppskriftið á netið hér og auðvitað sjálfri mér til
þæginda fyrst og fremst - nú eru að nálgast jól og ég þarf að hafa jólabakstursuppskriftirnar mínar á vísum
stað, ekki satt ?
Mér berast alltaf öðru hvoru beiðnir um einhverjar ákveðnar matar- eða bakstursuppskriftir. Ég reyni eftir
bestu getu að verða við þeim óskum, svo fremi sem ég eigi umbeðna uppskrift í fórum mínum, en verð þó að biðja
fólk að hafa í huga að þessi heimasíðugerð er áhugamál mitt, en ekki atvinna og er því allur gangur á
hvort og hvenær ég get sinnt slíkum beiðnum. Liggur samt ekki í augum uppi að allar
ábendingar um vefsíður þar sem matur kemur við sögu á einhvern hátt eru mjög vel þegnar ?
Helgu Sigurðardóttur, sem gaf fjölda matreiðslubóka kannast flestir við sem komnir eru til
vits og ára og er líklega einna þekktust bókin "Matur og Drykkur". Mér hefur smátt og smátt tekist að eignast
nokkrar af bókum Helgu og hef sett uppskriftir og leiðbeiningar mum matreiðslu úr
þeim hér og ættu þeir sem komnir eru til vits og ára að geta nú aftur
fundið "matinn hennar mömmu" eða "matinn hennar ömmu". Og hinir yngri, ekki ólust upp við þennan mat, geta
fræðst um hvaða matur var algengastur á borðum íslenskra fjölskyldna fyrir daga pizzu-, pasta- og skyndibitaáts.
Þegar matur var almennilegur matur !
Á vefsíðunni Tradisjoner.net má finna þó nokkuð margar uppskriftir úr
bókinni Matur og Drykkur.
Sameiginleg ætt okkar Helgu er oft kölluð "Matarkynið", sem er réttnefni því ótrúlega margir í þeirri
ætt hafa lagt fyrir sig nám og/eða störf tengd matargerð. Þeir sem starfa við eitthvað annað hugsa, lesa og
tala um mat ekki síður en matgerðarlið ættarinnar.
Önnur kona af þeirri sömu ætt, Jóninna Sigurðardóttir, sem var afasystir mín og föðursystir Helgu,
skrifaði bókina "Matreiðslubók fyrir fátæka og ríka", sem kom fyrst út 1915 og var síðan endurprentuð alls
fjórum sinnum eftir því sem ég kemst næst. Er það furða að mér verði oft hugsað um mat ?
Ég á "Jóninnubók" svo hver veit nema ég tíni til eitthvað úr þeirri bók líka og setji hér á síðuna, svona eftir
því sem mér vinnst tími til.
Ég á orðið ansi margar matreiðslubækur, svona nokkra bókahillumetra. Mér finnast
þær misgóðar og misjafnlega skemmtilegar aflestrar eins og gengur
Sú bók sem ég er að lesa mest núna er "Stóra baksturbókin". Hún er alveg frábær því í henni eru ekki
bara uppskriftir af nánast öllu sem manni getur dottið í hug að baka heldur líka mikill og góður fróðleikur
og leiðbeiningar um allt sem bakstri við kemur. Og fyrir þá sem þjást af glútenofnæmi ætti að koma sér vel
að finna í bókinni fullt af glútensnauðum uppskriftum. Þetta er ein þeirra bóka sem mér finnst þurfi að
vera til á hverju heimili.
Rétt er að taka fram að það er algjörlega mitt frumkvæði að mæla með þessari bók, mér blöskraði að
fá tvisvar með stuttu millibili inn um bréflúguna hjá mér tilboð um að kaupa þessa frábæru bók alveg á
spottprís. Ég hafði vitanlega keypt hana nánast strax og hún kom út og sé ekki eftir því.
Ég fékk þó, svona fyrir siða sakir, leyfi hjá útgefendum til að birta fáeinar uppskriftir
úr þessari eigulegu bók.
Maður kann sig nú - svona stöku sinnum :-))))
|
|
Saga Húsmæðrakennaraskóla Íslands í samantekt Önnu
Ó.Björnsson er létt og lifandi lesning um sögu húsmæðrafræðslu á Íslandi og segir frá ýmsum skemmtilegum
atvikum og uppákomum í skólastarfinu. Kennslan í skólanum gekk ekki einungis út á að kenna matreiðslu,
húshald og þess háttar, heldur var námsmeyjum einnig kennt að vera dömur.
Bókin, sem er 275 bls., er prýdd fjölda skemmtilegra mynda. Hægt að panta hjá Brynhildi Briem í síma
563-3915 eða með tölvupósti.
Kostar aðeins 3.000 krónur.
|
| |
"Hér eru engin látalæti,
lyftast faldar á kjólunum.
Heila nótt ég hoppað gæti
í Húsmæðrakennaraskólanum."
(Saga Húsmæðrakennaraskóla Íslands, bls.132)
|
Síðan gerð af Magnús Þór Magnússyni, sem er
búsettur í Noregi. Tilgangur síðunar er að setja á netið eitthvað af þeim menningararfi sem gamlar uppskriftir
hafa upp á að bjóða og hefur Magnús safnað á síðuna fjölda mörgum gömlum og
þjóðlegum uppskriftum frá Íslandi
(til dæmis úr Matur og drykkur), Noregi, Svíþjóð, Danmörk og Færeyjum. Á síðunni er, auk margskonar fróðleiks um mat,
yfir 1500 uppskriftir og alltaf er eitthvað nýtt að bætast við og því um að gera að fylgjast vel með.
Sem sagt fimm stjörnu matarsíða :-)
|
|
|
"The Culinary Saga of New Iceland" í samantekt Vestur-íslenskrar konu, Kristin
Olafson-Jenkyns, inniheldur meira en 200 uppskriftir sem Íslenskir Vesturfarar fluttu með sér að heiman og
hafa varðveitt kynslóð fram af kynslóð og hef ég fengið leyfi hjá útgefanda til að birta nokkrar þeirra
hér.
Uppskriftirnar eru á ensku því vestur-íslenskan skilar sér engan veginn sé farið að þýða þær.
Þetta er bók sem maður les aftur og aftur.
Fæst í bókabúðum hérlendis.
|
|
og fara alveg eins og skot beint á matartenglana !
