Ágætir félagsmenn og velunnarar !

Ég ætla að stikla hér á stóru um starfsemi Sigurvonar og kem síðar inn á starfið síðasta ár.

Sigurvon var stofnað 4. nóvember 2001 hefur félagið haldið reglulega stjórnarfundi, sem aðalfundi og eins hafa verið flutt erindi af bæði heimamönnum sem gestum víða af á landinu.

Stofnaður var stuðningshópurinn “Vinir í von” fyrir bæði krabbameinsgreinda sem aðstandendur og var hann í umsjón Heiðrúnar Björnsdóttur. Til standa breytingar á starfi “Vina í von” og munu Auður Ólafsdóttir, Guðfinna Sigurjónsdóttir og Heiðrún Björnsdóttir taka höndum saman og blása nýju lífi í starfið. Fyrsti fundur fer fram 16. nóvember kl. 20:00 í aðstöðu Vesturafls og stefnir í góða þátttöku.

Nokkrir fastir liðir hafa verið í starfi félagsins þessi ár, svo sem fjáröflun, sala á minningarkortum, pennum, lyklakippum og jólakortum. Eins hefur félagið tekið þátt í átakinu “bleika slaufan” og ýmsar byggingar verið lýstar bleikar, víða á Vestfjörðum. Ísblikk ehf (Marinó Hákonarsson)   Útbjó festingar til að setja á ljósakastara framan við Safnahúsið til að bleikja það og setti þær upp í október, Sigurvon að kostnaðarlausu. Þetta eru festingar sem hægt er að nota ár eftir ár. Frábært framtak sem ber að þakka.

Miklar peningagjafir hafa borist félaginu á þessum árum, ýmist í formi gjafa, vinnuframlags, peninga, afraksturs ýmissa söfnuna og kunnum við öllum þessum aðilum bestu þakkir fyrir, en við finnum fyrir miklum velvilja og stuðningi til félagsins á okkar svæði, þrátt fyrir kreppuástand í þjóðfélaginu.

Á aðalfundi 2005 var stofnaður sérstakur styrktarsjóður Styrktarsjóður Krabbameinsfélagsins Sigurvonar. Tilgangur og markmið sjóðsins er að styrkja og efla hverja þá starfsemi sem lýtur að málefnum krabbameinssjúklinga á starfssvæði Krabbameinsfélagsins Sigurvonar og auka lífsgæði þeirra.

Um styrk úr sjóðnum geta sótt allir félagsmenn í Sigurvon svo og þeir sem starfa með einum eða öðrum hætti að málefnum krabbameinssjúklinga.

Sigurvon hefur veitt ýmsa styrki til kaupa á tækjum eða til rannsókna á krabbameini. Nú í september gaf Sigurvon flatskjá til Krabbameinsfélags Íslands, til að nota í einni af íbúðunum sem félagið heldur úti fyrir sjúklinga af landsbyggðinni.

Upplýsingaritið Hagnýtar upplýsingar til krabbameinssjúklinga og aðstandenda þeirra var gefið út fyrir nokkrum árum og dreift á öll heimili á Vestfjörðum, allt frá Barðaströnd og norður á Strandir. Í ár gaf félagið í fyrsta sinn út lítið fréttabréf og var því dreift um norðanverða Vestfirði.

Félagið hefur einnig sett upp heimasíðu og er þar að finna allar upplýsingar um félagið og starfsemi þess, en slóðin er svon.blogspot.com

Söfnun félagsmanna hefur gengið vel og er komin yfir 200 manns. Innheimta félagsgjalda fer fram með gíróseðli frá Sparisjóði Vestfirðinga og er árgjald í dag 2000 kr. Stjórn félagsins hefur verið nánast sú sama og frá upphafi og er félagið með einn starfsmann.

Stjórnarfundir eru haldnir mánaðarlega og oftar ef þörf þykir og eru þeir allir ritaðir í dag til upplýsinga fyrir þá er á eftir koma og eru fundargerðir sendar öllum stjórnarmönnum

Skrifstofa félagsins er opin þrjá daga vikunnar, tvo tíma í senn. Þriðju- og miðvikudaga frá 10:00-12:00 og frimmtudaga frá 11:00-13:00. Í haust hefur starfsmaður unnið heiman frá sér af persónulegum ástæðum og er fyrir vikið í vinnu nánast allan sólarhringinn og þessi ráðstöfun því gagnast mjög vel báðum aðilum.

Sigurvon er enn þeirrar gæfu aðnjótandi að geta boðið félagsmönnum sínum upp á að borga að fullu gistingarkostnað þegar þeir njóta meðferðar utanbæjar og óskandi að það verði hægt sem lengst.

Starfsemi félagsins spannar mjög stórst svæði eða alla norðanverða Vestfirði og eru ófá bæjarfélög á svæðinu, eða Ísafjarðarbær (Ísafjörður, Suðureyri, Flateyri, Þingeyri, Mýrarhreppur), Bolungarvík, Súðavík, Hólmavík og allt Ísafjarðardjúp.

Til að hægt sé að halda svona félagi starfandi þarf fjármuni og eru það aðallega félagsgjöld félagsmanna sem reka félagið ásamt frjálsum framlögum sem eru ómetanleg.

Tekist hefur að vekja mikla athygli á félaginu og starfi þess og á félagið marga styktaraðila hér í bæ, t.d. BB eða bæjarins besta, sem er bæjarblaðið okkar og rekur jafnframt fréttavefsíðu. BB er mjög duglegt að auglýsa starf Sigurvonar. Má einnig nefna að veitingar á aðalfundum félagsins hafa alla tíð verið í boði Sparisjóðs Vestfirðinga, sem er enn einn styrktaraðili Sigurvonar.

Ef ég stikla á stóru fyrir árið 2009 og tek mið af síðasta aðalfundi, þá tók félagið þátt í að vekja athygli á hinum ýmsu atburðum og átökum sem í gangi eru hverju sinni.

Nefna má átak gegn leghálskrabbameini, Orlofsdvöl að Löngumýri, starfsemi þjónustumiðstöðvar KÍ, átakinu um Karla og krabbamein, Hættan er ljós, ljósabekkjanotkun unglinga. Félagið tók þátt í átakinu, Á allra vörum og seldi gloss. Árlegur blettadagur var haldinn bæði á Ísafirði og á Hólmavík og var mjög góð þátttaka. Þrír ný útskrifaðir hjúkrunarfræðingar unnu lokaverkefni um brjóstakrabbamein og héldu námskeið fyrir stúlkur í Menntaskólanum á Ísafirði, tæplega 50 stúlkur sóttu námskeiðið og styrkti Sigurvon hjúkrunarnemana varðandi ferðakostnað. Námskeiðið gekk mjög vel og voru nemendur mjög ánægðir.

Ég mætti á samráðsfund suður í maí og sat námskeiðið Bætt hugsun, betri líðan, en samnefnd bók er til á skrifstofu Sigurvonar og liggur þar frammi til kynningar og er mjög áhugaverð.

Félagið tók þátt í Göngum saman og margfaldaðist þátttaka frá fyrra ári og er stefnt að því að taka þátt á hverju ári.

Bangsar KÍ voru seldir í verslunum á Ísafirði til styrktar leitarstarfi hjá Krabbameinsfélagi Íslands.

Félagið gaf í fyrsta sinn út lítið fréttabréf, eins og kom fram áðan og óskandi að hægt verði að endurtaka þessa útgáfu árlega, með nýjustu fréttum og upplýsingum.

Út er komin bókin Bragð í baráttunni - matur sem vinnur gegn krabbameini. Þar eru einnig að finna yfir 160 gómsætar uppskriftir sem auðvelt er að fara eftir. Bókin fæst í öllum helstu bókaverslunum landsins.

Félagið heldur úti virkri heimasíðu og má alltaf finna helstu upplýsingar á síðunni. Eins og sjá má hefur ýmsu verið áorkað og er stefnan að halda því áfram.

Annað sem er ómissandi í öllum félögum er virk stjórn og er mitt mat að leitun sé að virkari eða skemmtilegri stjórn og vinna stjórnarmenn mjög fórnfúst starf og gefa alla sína vinnu sem er félaginu mjög mikilvægt.

Að lokum vil ég færa ykkur bestu kveðjur frá stjórn Sigurvonar og starfsmanni með von um áframhaldandi gott samstarf !

Ingibjörg Snorra, starfsmaður