---

Topplistar Séra Ólafs Björnssonar, doktors í einlægri tónlistarspeki.

---

18. mars - 01:04
Róttækar breytingar

Jæja já. Þá hefur stór ákvörðun verið tekin.

Nánar: olibj.wordpress.com


12. mars - 22:46
Músíkþankar (og þetta er asnaleg regla)

Ég er farinn að hafa örlitlar áhyggjur af tónlistarlegum áhuga mínum nú til dags. Ekki miskilja, ég hlusta alveg jafn mikið á tónlist og áður en það verður alltaf minna og minna af nýrri tónlist sem heillar mig. Ég hef mikið velt þessu fyrir mér upp á síðkastið og reynt að komast að því hvað veldur. Ástæðan gæti verið sú að tónlist er orðin það auðveld í framleiðslu að hún verður verri og verri. En það er að sjálfsögðu margt sem heillar mig en ekki eins mikið og áður.

Ég hef ekki hugsað mikið út í þetta af alvöru og aldrei almennilega pælt í því hvað það raunverulega er sem fær mig til að finnast eitthvað lag betra en annað. Auðvitað finnst mér mjög mikilvægt að áheyrilegur trommari berji húðirnar og eins er það ótrúlega mikið atriði að söngvarinn sé góður. Það er alltaf mikið af góðum hljómsveitum til sem semja fín lög en hafa svo innaborðs söngvara sem nær að eyðileggja heildarmyndina. Grípandi texta vil ég hafa í lögunum og auðvitað yfir það heila góðan flutning. En það kom mér á óvart að eitt tel ég mikilvægara en allt sem ég hef talið upp hér á undan. Og það er gott gítarsóló. Og þar kemur niðurstaðan.

Gítarhetjur eru á undanhaldi. Svo einfalt er það. Við sjáum minna og minna af gítarleikurum í þessum stóru hljómsveitum í dag sem geta tekið almennileg gítarsóló. Þær hljómsveitir sem heillað hafa mig í gegnum tíðina eins og t.d. Pearl Jam, Pink Floyd, The Who, Metallica, Pantera og margar fleiri eiga það allar sameiginlegt að innihalda þessa klassísku gítarhetju sem getur tekið sóló sem fær mann til að gráta. Mike McCready, David Gilmour, Pete Townshend, Kirk Hammett og síðast en ekki síst Dimebag Darrell eru allt saman menn sem geta tekið gítarsóló frá helvíti. Ég er ekki að segja að það sé alveg nauðsynlegt að góðar hjómsveitir hafi framúrskarandi sólógítarleikara innanborðs. Það eru að sjálfsögðu fjölmargar af mínum uppáhaldshljómsveitum sem ekki hafa einn slíkan innaborðs. En flestar státa af gítarhetju.

Mér finnst þessi músík nú til dags fín. En þetta er flest allt bara meðalgott en auðvitað bregður fyrir einni og einni hljómsveit sem er frábær. But we need another hero!



6. mars - 21:18
Þorrablót

Þorrablót Borgfirðinga var haldið 3. febrúar sl. og óhætt að segja að þar hafi tekist vel til og skemmtun og matur verið til sóma eins og vant er. Þó vantaði eitthvað pínulítið uppá að stemmning yrði eins og best verður og á kosið eins og yfirleitt er á þessari mögnuðu skemmtun. Ekki var því um að kenna að skemmtiatriði væri af lakara taginu eða maturinn vondur. Síður en svo. En svona er þetta bara stundum, stemmning er fín en þó finnst manni eins og vanti örlítið upp á að hún sé frábær. Ég vil persónulega kenna því að ekki var gert hlé á dagskrá og því minna um að menn færu á barinn til að kaupa sér áfengi. Eins finnst mér eins og síðustu ár hafi almenn ölvun verið minni en vant er og auðvitað finnst manni það miður. Ástæða þess að ölvun er minni gæti verið sú að fleiri skemmtanir eru yfir árið heldur en áður fyrr. Áður fyrr voru þorrablótin eina skemmtunin sem fólk fór á yfir árið og að sjálfsögðu var þá drykkju- og skemmtanaþörfin orðin svo gífurleg að menn voru yfirleitt orðnir veltandi ölvaðir þegar skemmtiatriðin voru að byrja.

Við Gúndi á Jökulsá veltum þessu mikið fyrir okkur á ballinu eftir sl. blót. Við minntumst báðir þess tíma þegar við vorum í grunnskóla en þá var grunnskólinn sælla minninga á efri hæð félagsheimilisins. Það var undantekning ef ælulyktin kom ekki vaðandi á móti manni þegar maður mætti í skólann á mánudegi eftir þorrablót. Vaskar á klósettinu báru þess stundum ennþá merki að þeir hefðu verið notaðir sem áhald til að skila þorramat og áfengi. Ég man eftir því að við nemendur mældum þorrablótin eftir lyktinni á mánudegi. Ef það var ælulykt þá hafði blótið tekist fullkomlega en ef engin var ælulyktin töldum við það öruggt að halda fram að blótið hefði ekki verið tekist eins og best var á kosið.

En það breytir því ekki að það er alltaf upplifun að fara á þorrablót á Borgarfirði þó menn séu hættir að æla á ballinu. En ég hvet Borgfirðinga, burtflutta og aðkomumenn að taka sig á fyrir næsta blót og drekka frá sér allt vit og helst æla í vaskana á karlaklósettinu og auðvitað yrði það frábær bónus ef vaskarnir á kvennaklósettinu yrði skreyttir líka.




25. febrúar - 10:04
Matarverð

Ég veit ekki hvort ég er sá eini sem tekið hefur eftir því að mataverð hefur hækkað upp á síðkastið. Og það ekkert smá. Við Inga kaupum nú yfirleitt það sama svona að jafnaði í Kaupfélaginu á Djúpavogi. Helstu nauðsynjavörur bera þar hæst þó óþarfa vara slæðist við og við ofan í körfuna. En það er sama hvort varan er nauðsynleg eða óþörf. Það hefur hækkað ískyggilega verðið á hvorutveggja (eða hvorutveggju?). Hvort sem það eru birgjarnir í helvítis Reykjavíkinni eða bara kaupmenn sem lætt hafa þessum hækkunum að þá verður eitthvað að gera. Virðisauki á matarverði lækkar eins og allir vita 1. mars en miðað við þessar hækkanir á vöruverði þá get ég ekki betur séð en að varan eigi eftir að skila sér dýrari heldur en áður.

Við getum tekið sem dæmi AB drykkjarjógúrt sem er yfirleitt partur af morgunverði okkar Ingu. Þetta er svona drykkjarjógúrt í litlum 250 ml dollum. Síðan þessi jógúrt kom á markað seint á síðasta ári hefur dollan kostað 85 krónur. Inga tók eftir því í dag að dollan hefur hækkað um litlar 30 krónur. Jájá, hún er komin í 115 kr. Það er helvítis mikil hækkun! 115 krónur fyrir 250ml af sykri og sýru! Einnig notum við sveppi í nánast allt sem við eldum. Það skal hér með tekið fram að steiktir sveppir er eitt af því besta sem ég veit. Við kaupum alltaf Flúðasveppi í svona bláum bökkum. Síðan ég veit ekki hvenær hefur bakkinn kostað kr. 249. Einn dagin er ég var í mesta sakleysi að versla tók ég eftir því að bakkinn hafði allt í einu hækkað um 20 krónur, kominn í 269. Bara allt í einu. Hvað á svona lagað að þýða? Ég er ekki að segja að 20 krónur séu einhver formúga en þetta er þrátt fyrir það tölverð hækkun svona á einum degi. Síðast en ekki síst skal því hér komið á framfæri að hálfur líter af gosi kostar í Samkaupum kr. 169, takk fyrir.
Hálfur líter. Svo er pabbi undrandi á því að maður versli í Bónus þegar færi gefst!

Ég vildi stundum óska að við Íslendingar værum svona svoldið eins og Frakkarnir. Ef það er eitthvað sem okkur Íslendingum mislíkar þá bölvum við og rögnum í náunganum við hlið okkar í nokkra daga og svo er það bara gleymt og grafið og við látum hlutina yfir okkur ganga eins og ekkert sé sjálfsagðara. En Frakkarnir verða einfaldlega brjálaðir. Þeir hlaupa naktir út á götur vopnaðir skóflum, kúbeinum og eldspýtum og brjóta allt sem á vegi þeirra verður og kveikja svo í því ef þeir eru ekki sáttir. Þeir loka stórum umferðaræðum á nokkrum sekúndum eða sprengja einfaldlega bara upp vegina. Já, þeir láta í sér heyra ef þeim er misboðið. Ég er ekki að segja að t.a.m. Djúpavogsbúar ættu að fylkja liði niður að Samkaupum, taka Ingibjörgu og Nínu í gíslíngu og hóta að sprengja helvítis kaupfélagskofann ef matarverð verður ekki lækkað en það er samt hægt að láta í sér heyra til að eitthvað verði gert.
Er ég farinn að hljóma óþarflega mikið eins og Steingrímur Joð?



9. febrúar - 22:07
Af hverju...

...í ósköpunum er aldrei útsala í Áfengis og tóbaksverslun ríksisins?
Haldiði að það væri nú munur að geta skroppið á útrýmingarsölu hjá ÁTVR og keypt kassa á bjór á verði einnar kippu?
90% afsláttur af Holsten í gleri ! Fyrstur kemur fyrstur fær.
2 fyrir 1 af rauðvíni alla helgina!
Þetta hljómar kannski mjög fjarstæðukennt en ég hef samt aldrei getað skilið hvers vegna ÁTVR er eina verslunin sem aldrei er útsala í. Ég meina, það endar alltaf með því að áfengi rennur út. Er aldrei áfengi á síðasta séns í ÁTVR? Hvað verður um það? Maður myndi láta sig hafa það að kaupa kassa af bjór sem rynni út eftir viku. Það tekur nú ekki langan tíma að slátra einum kassa.
Gaman væri nú að alltaf eftir stórsöluhelgar eins og verslunarmannahelgina væri stórútsala á áfengi og maður gæti byrgt sig upp fyrir haustið. En það verður sennilega seint og eflaust er töluvert líklegra að áfengi hækki frekar en ríkið hlusti á þessar hugmyndir mínar.

Bless og takk, ekkert snakk (þeir fá prik sem vita úr hverju þetta er)



6. febrúar - 22:12
Ný regla

Ok, nú er ný regla í gangi hérna. Þar sem ég fæ að jafnaði lítið feedback á skrifin mín eftir að ég kom með þetta kommentakerfi (reyndar hefur það verið með besta móti eftir að ég byrjaði að skrifa aftur), þá... verður ekki skrifuð ný færsla nema 8 komment séu komin á síðustu færslu. Og það það þýðir lítið að svindla með því að einn skrifi 8 komment í einu... 8 komment frá 8 mismunandi manneskjum og þá er ég ekki meðtalinn þegar ég er að svara kommentum! Ok?

Stóðar gundir



31. janúar - 20:58
Skáldskapur

Eftir því sem ég best veit er Kristján Hreinsson höfundur texta í 90% tilvika í þessu júróvisjónfári. Eftir því sem ég kemst næst eru nærri 100% þessara texta ýmist sorp eða rusl. Það sem ég næ ekki niðurstöðu í er hvers vegna allir fá hann til að semja texta. Er það bara af því að hann er kallaður skáldið úr Skerjafirðinum og allir halda að hann sé agalega snjall. Vel má vera að hann sé ágætur í ljóðagerð en þegar kemur að dægurlagatextagerð er hann í hópi með strákunum úr Skítarmóral, Von og Buttercup. Ekki leiðum að líkjast...
Svona fer þegar blindur almúginn heldur að eitthvað sé frábært sem er ekki frábært. Bara af því að hann heitir skáldið í Skerjafirðinum þá halda allir að hann sé snillingur á öllum sviðum skáldskapar og ekkert geti verið slæmt sem hann gerir. Það er nú öðru nær. Hlustið gaumgæfilega á þessa texta í júróvisjónlögunum og spyrjið ykkur hvort hvaða sauður sem er gæti ekki samið svona sleikibrjóstsykurstexta.

Og hana nú!

Góðar stundir



30. janúar - 21:51
Áfram Ísland

Best að fara út og skalla naglavegg.

Góðar stundir.



29. janúar - 20:51
Músík

Ég hef sennilega ekki hlustað nógu mikið á nýjar plötur ársins 2006 því eftir miklar pælingar náði ég einungis að skrapa saman 4 erlendum og 4 innlendum plötum sem ég hafði mætur á. En listann birti ég þó. Þetta eru þær plötur sem höfðuðu mest til mín, hvort sem fólki líkar betur eða verr. Og hefst þá lesturinn.

- Af innlendum vettvangi -

4. sæti - Sálin og gospel - Lifandi í Laugardalshöll



3. sæti - Baggalútur - Aparnir í Eden



2. sæti - Hildur Vala - La La la



1. sæti - Pétur Ben - Wine for my weakness




-----------------------------------------------------------------------------------------------

- Af erlendum vettvangi -

4. sæti - Muse - Blackholes and Revelations



3. sæti - David Gilmour - On an Island



2. sæti - Belle and Sebastian - The Life Pursuit



1. sæti - Pearl Jam - Pearl Jam



Góðar stundir



25. janúar - 21:29
Pása

Eftir þessa gríðarlegu bloggtörn sé ég mér ekki annað fært en að taka mér helgarfrí. Mæti vaskur í nýrri viku.

Góðar stundir



24. janúar - 19:47
Heiðurshjónin Steindór Einarsson og Rúna Birna Halldórsdóttir frá Víðastöðum

Þegar ég stend við það að draga björg í bú í beituskúrnum rifjast oft upp fyrir mér fysta skiptið sem ég afrekaði það að draga björg í bú. Það voru ekki stór björg sem ég dróg í búið en sennilega hafa þau skipt einhverju máli í einhvern tíma. Ég var að ég hygg 11 ára gamall og man þetta eins og það hafi gerst í gær.

Í þá daga var það siður þeirra heiðurshjóna Steindórs Einarssonar og Rúnu Birnu Halldórsdóttur á Víðastöðum í Hjaltastaðaþinghá að leggja leið sína á rútu sinni, vopnaðri kartöflum og rófum, niður á Borgarfjörð í þeim tilgangi að selja sísvöngum Borgfirðingnum hluta uppskerunnar. Sá siður komst á að ég, þá barnungur drengurinn, var fenginn til að taka rúntinn með þeim um fjörðinn. Hlutverk mitt var að lokka grandalausan sveitamanninn út að rútunni til þess að Steindór og frú gætu sýnt honum hvað þau hefðu þar að geyma. Þetta er reyndar kannski örlítið ýkt frásögn því yfirleitt vissu allir Steindór og frú væru væntanleg en ég var fenginn til að banka á hvern bæ svo þau þyrftu nú ekki að óþörfu að hreyfa lúin bein eftir kartöflu- og rófutýnslu síðustu missera. Það má fylgja sögunni og mér fannst alveg einstakt að hver einn og einasti kúnni skyldi kaupa af þeim og það ekkert smá. Ég taldi alveg víst að það væri allt saman mér að þakka, slík væri sannfæringin þegar ég útskýrði fyrir heimilisfólki að Steindór væri kominn til að selja kartöflur. Má vera að sölumannseðlið í mér hafi spilað þarna inn í en líklegri verður sú skýring að teljast að fólki hafi einfaldlega verið farið að lengja eftir varningnum.

Mér fannst þetta einstaklega göfugt starf og hlakkaði til í hvert skipti sem ég vissi að heiðurshjónin væru væntanleg af Héraði. Launin voru heldur ekki af lakara taginu. Ég er ekki viss um að krakkar nú til dags myndu gleðjast yfir laununum en mér fannst þau einstaklega höfðingleg. Og því gleymi ég aldrei þegar ég kom með þau heim í fysta sinn.

Ég man vel eftir því þegar ég gekk inn um heimilisdyrnar í Heiðmörk eftir fyrstu ferðina, klyfjaður tveimur kartöflusekkjum og einum rófusekk. Karl faðir minn lá upp í sófa og reis upp þegar hann sá mig og er algjör óþarfi að vera að orðlengja það eitthvað að stoltið skein úr augum hans. Ég man það sérstklega að pabbi sagði við mig að ég mætti vera stoltur af því að þetta væri í fyrsta skipti sem ég færði eitthvað til heimilisins. Ég hafði nú ekki áttað mig á því beint en þegar hann sagði þetta má segja að ég hafi verið í þann mund að rifna úr monti.

Þessi búbjargadráttur (þetta er nýtt orð sem ég fann upp, sem er skrítið þar sem ég er ekki enn búinn að átt mig á meiningunni "að draga björg í bú") varð árlegur viðburður í ein 3-4 ár. Ég man nú ekki hvað varð til þess að Steindór og frú hættu að fá mig til að aðstoða sig. Kannski var það að ég hafði misst sölumannseðlið, má vera að þeim hafi fundist að sannfæringarkrafturinn væri horfinn. Það getur líka verið að sú staðreynd að ég fór snemma í mútur hafi haft einhver áhrif. Hvað sem því líður er ég ævinlega þakklátur þeim hjónum fyrir þetta tækifæri til að sýna að ég gat hjálpað til. Þó það væru ekki nema kartöflur og rófur sem ég færði til heimilisins þá hefur foreldra mína kannski munað um það í einhvern tíma. Ja, allavega var pabbi stoltur. Og mamma grét.

Góðar stundir

---

---

upp

Sendu mér SMS

-----------------------

Mæspeisið

Póstur

að skoða síðuna