Forsíða
Frumsamið
Efst á baugi
Tenglar
Jón Heiðar

Blogg

Styrkleikar og veikleikar vefsetra í markaðsstarfi
29. mars, 2003

Á dögunum fékk ég fyrirspurn í tölvupósti um hvað ég teldi vera helstu styrkleika og veikleika vefsetra sem markaðs- og kynningartæki fyrir fyrirtæki. Eftir nokkra umhugsun þá dró ég fram eftirfarandi þætti (aðeins uppfært og lagfært).

Vefurinn á að vera hluti af starfsemi og þjónustu fyrirtækisins
Aðalatriði er að rekstur, framsetning og efnistök vefseturs sé í góðum tengslum við aðrar dreifileiðir, upplýsingaveitur og þjónustuleiðir fyrirtækisins. Það á að vera starfrækt út frá markaðsstefnu, almannatengslum og viðskiptastefnu fyrirtækisins og styðja við aðra starfsemi þess. Markmið með rekstri þess eiga að vera ljós og fylgja vandlega mótaðri stefnumótun.

Náist þetta skipta einstakir hnökrar litlu máli. Það er alltof algengt að vefsetur eigi einskonar sjálfstætt líf frá annarri starfsemi fyrirtækja og er það yfirleitt stærsti veikleiki þeirra. 

Nokkrir hugsanlegir styrkleikar

24/7 þjónusta

Vefurinn getur verið opinn allan sólarhringinn

Gagnvirkur stuðningur við þjónustuver, kynningu og sölu

Vefurinn getur innihaldið sérhæft efni eins og t.d. vörulýsingar og leiðbeiningar. Þannig getur vefsetrið minnkað álag á starfsfólk og gefið því betri tíma til að sinna ráðgjöf og sölu til viðskiptavina.

Hægt er að styrkja tengsl við viðskiptavini og aðra mikilvæga markhópa með því að bjóða þeim aðgang að lokuðu viðskipta- og þjónustusvæði á Netinu.

Vefurinn getur auðveldað aðgengi að tengiliðum (sölufólki, almannatengslafólki, þjónustufulltrúum).

Fái notendur til þess rétta hvatann geta þeir séð um að markaðssetja vefsetrið og þjónustu þess fyrir þig. Þetta er hægt með því að hafa áhugavert efni á vefnum sem hægt er að senda á vini, samstarfsmenn og fjölskyldumeðlimi eða með því hreinlega að bjóða umbun fyrir ef notendur fá aðra til þess að skrá sig á vefsvæðinu.

Margmiðlun
Sívaxandi möguleikar eru til þess að nota hreyfimyndir og hljóð á vefnum.

Ný dreifileið
Vefurinn getur opnað fyrirtækjum leið að nýjum mörkuðum í útlöndum með tiltölulega hagkvæmum hætti. Þetta á sérstaklega við ef boðið er upp á afar sérhæfða vöru og þjónustu (þetta minnir á gamla brandaranum um að markaðurinn á Íslandi með vörur fyrir örvhenda golfara sé agnarsmár en hann sé risastór á heimsvísu).

Nokkrir hugsanlegir veikleikar

24/7 krafan
Tryggja þarf að vefur sé uppi helst allan sólarhringinn, allt árið um kring. Þetta getur kostað sitt.

Mikil vinna
Skipuleggja þarf aðgengi að upplýsingum vel og vandlega - annars geta símtöl í þjónustuver farið að snúast að miklu leyti um það að reiðir netnotendur finna ekki upplýsingar á Netinu!

Ef ætlunin er að kynna vefsetur í útlöndum þarf það að henta þörfum notenda þar en fyrst þarf að huga að því hvort Internetnotkun í viðkomandi landi sé nægileg til að réttlæta kostnað og vinnu við að koma upp vefsvæði fyrir þann markað.

Áreiti af tölvupósti 
Séu netföng á vefjum opinber geta borist þangað mikið magn af ruslpósti - þjálfa þarf starfsfólk til að svara tölvupósti með skilvirkum hætti.

Vefurinn er "passívur" (hlédrægur) miðill
Notendur þurfa einhvern hvata til að fara inn á hann. Hann þarf að kynna með einhverjum hætti, með auglýsingum, umfjöllun í fjölmiðlun eða með skráningar í leitarvélar. Slíkt getur verið kostnaðarsamt og tímafrekt.

Tæknilegar hindranir
 Margir notendur eru ekki með bandbreidd, hugbúnað eða vélbúnað til að sjá eða sækja hreyfimyndir eða hlusta á hljóðskrár á Netinu.

Nýr miðill
Margir notendur treysta ekki vefjum eða "lesa" þá ekki - alþekkt er að notendur skanna vefsíður en lesa sjaldnast langa texta á þeim.

Margir nota ekki vefinn og vilja ekki nota hann.

Margir netnotendur eru ennþá byrjendur og treysta lítið á vefinn í upplýsingaöflun sinni og viðskiptum.

Kröfuharðir notendur
Sé vefur misheppnaður á einhvern hátt veikir það ímynd fyrirtækis (t.d. ef vefur er niðri, illa hannaður eða ef upplýsingar finnast ekki strax) Netnotendur eru oft afar kröfuharðir