Lærði á tölvur í VÍ og kenndi á tölvunámskeiðum fyrir börn og unglinga

Ég er fædd í Reykjavík árið 1965 og næstyngst fimm systkina. Systkini mín hafa farið ólíkar brautir en öll höfum við hvert á sinn hátt tengst tækniheiminum í einhvern tíma. Fjögur okkar starfa í dag í þeim geira.

Þegar barnaskóla sleppti fór ég í Verslunarskóla Íslands og stundaði þar nám í 5 ár. Tók e.t.v. félagslífið fastari tökum en námið! Á mínu fyrsta ári í VÍ var tölvukennsla í fyrsta skipti hluti af föstu námi. Þetta þótti mikil nýbreytni og gagnaðist okkur ágætlega á þeim tíma. Þetta átti vel við mig og ég tók að mér stundakennslu hjá Íþrótta- og tómstundaráði í tölvunámi fyrir börn og unglinga, í tvo vetur. Í VÍ vaknaði áhugi á ýmsu m.a. ljósmyndun, videótökum, hljóðvinnslu og öðru sem þótti kannski ekki mjög stelpulegt á þeim tíma. Ég velti þó ekki vöngum yfir því þá, heldur gerði það sem hugurinn stóð til.

Nám í hljóðtækni í Hollandi og Austurríki
Starf hjá tæknideild útvarpsins

Ég tók að starfa meðfram námi hjá Rás 2 og kynntist mörgum hliðum fjölmiðlunar á þeim tíma. Þá fór ég að átta mig á því að ég gat ekki hugsað mér að pikka á ritvél eða færa bókhald í mínu framtíðarstarfi. Ég ákvað að fara út í eitthvað skapandi, eitthvað tæknilegt og skellti mér því í hljóðupptökunám. Það var ekki úr neinu að moða hér heima í þeim efnum og endaði námsleit mín árið 1987 í Hollandi. Ég var við nám í Sonology í tónlistarháskólanum í Haag í tvö ár en fluttist svo til Vínarborgar og einangraði hljóðvinnslu enn frekar frá “hljóðfræðum” og innritaði mig í nám við School of Audio Engineering. Haustið 1991 þegar því námi lauk fluttist ég heim og hóf störf hjá tæknideild útvarpsins. Þar starfaði ég sem hljóðtæknimaður til 1997. Á því tímabili fór ég til Danmerkur til námsdvalar með eiginmanni mínum og kornungum syni. Þar kynntist ég fyrst Internetinu og fannst frábært hversu vel gekk að fylgjast með fréttum frá Íslandi miðað við á námsárum mínum nokkrum árum fyrr.

Vefstjóri hjá RÚV

Þegar heim kom, fór ég á mitt fyrsta HTML námskeið hjá Endurmenntunarstofnun Háskóla Íslands og sannfærði yfirmenn mína um það að ég gæti búið til heimasíðu. Ég fékk tækifæri til að sýna hvað í mér bjó í forsetakosningunum 1996. Þá má segja að komið hafi fram fyrsti vísir að fréttamiðli RÚV á Netinu. Tilraunin þótti takast ágætlega, þótt tæknilega væri hugmyndinni þröngur stakkur sniðinn. En þetta varð til þess að ég fékk það verkefni að huga að vef fyrir stofnunina og gerði það í aukavinnu til viðbótar mínum föstu vöktum í hljóðverum tæknideildarinnar. Það var mjög spennandi að fá tækifæri til að byggja þetta upp og eflaust hefði engan órað fyrir því þá, hversu fljótt þetta átti eftir að hlaða utan á sig. 1997 var svo gerð hálf staða fyrir starfssemina og 1998 full staða vefstjóra. Ég gerði upp hug minn og ákvað að taka stökkið inn í upplýsingabyltinguna á Netinu og leggja til hliðar hljóðvinnsluna, a.m.k. í bili. Ég fór á námskeið í vefsíðustjórnun, margmiðlun, þrívíddargrafík, verkefnisstjórnun o.fl. o.fl. hjá Rafiðnaðarskólanum og Endurmenntunarstofnun HÍ. Þar sem RÚV er þátttakandi í alþjóðlegu samstarfi á borð við Nordvision og European Broadcasting Union hef ég átt þess kost að sækja fundi og ráðstefnur sem tengjast margmiðlunar- og internetmálum og haft mikið gagn af.

1998 fóru ávextir vinnuerfiðisins að koma í ljós. Snemma það ár kom Passíusálmavefurinn út á Vefinn og í kjölfarið fylgdu svo Nóbelsvefur, Hernámsvefur og Lýðveldisvefur undir hatti Íslandssöguvefs RÚV og fleiri stofnana. Ég lagði á það mikla áherslu að hlutverk RÚV á Vefnum hlyti m.a. að vera að miðla menningarefni og nýting safna stofnunarinnar í þessum tilgangi væri fýsileg og spennandi. Seinna sama ár óx vefur Ríkisútvarpsins, ruv.is til muna, varð efnismeiri en nokkru sinni, auk þess sem nýir kaflar bættust við Íslandssöguvefinn.

Gagnvirkur útvarpsþáttur fyrir börn og menningarborgarverkefnið Fögnuður

Á síðasta ári sótti ég um styrk til Menningarsjóðs útvarpsstöðva til að gera gagnvirkan útvarpsþátt fyrir börn. Styrkur var veittur til verkefnisins og er árangurinn Vitinn, útvarpsþáttur og vefur fyrir krakka. Árið á undan hafði komið styrkvilyrði frá Reykjavík menningarborg árið 2000 til að gera "Gleðivefinn Fögnuð" sem opnaður var 29. febrúar s.l.

Fjölbreytt dagleg verkefni

Starfið hefur verið skemmtilegt og fjölbreytilegt og fleiri og fleiri verkefni komið inn á mitt borð sem gaman hefur verið að spreyta sig á. Minn helsti óvinur í starfi er klukkan, þar sem mér finnst ég sjaldnast hafa tíma til að sinna starfinu sem skyldi enda byggist það upp á mörgum ólíkum þáttum, sem ég vona að taki breytingum með nýju fólki.

Til gamans er hér brot af því sem telst til daglegra verkefna minna:

• Vefsíðugerð bæði með vefsíðukerfi og “handskrifuðu” HTML vefsíðumáli.
• Rýni í það sem stendur á bak við vefinn eins og ákv. forritunarmál.
• Ritstjórn vefsíðna í vefsíðukerfi, samþykktarferli, auglýsingagerð og birting, póstlistaumsjón ofl.
• Vinnsla með hljóð- og myndefni, klippt til, útbúið fyrir Vefinn og unnið upp úr.
• Tölvupóstsamskipti: Gífurlegt magn af pósti berst frá gestum RÚV vefisins, viðskiptavinum RÚV, vegna erlendra samskipta, fyrirspurna um ólíklegustu hluti og starfsmönnum RÚV.
• “Help-desk” þ.e.a.s. aðstoð veitt við vefsíðukerfið, vefinn ofl. í gegnum síma og póst bæði til starfsmanna og notenda/gesta vefsins.
• Bakvakt og ef bilun verður hugsanlega þörf til að endurræsa ákveðinn hluta vefþjónustunnar.
• Samskipti við þjónustuaðila, fjármál þeim tengd.
• Nýjungar á Vefnum.
• Ráðgjöf fyrir stofnunina þegar kemur að Vefnum og margmiðlunarmálum.
• Talnaspeki vefsins.

Nokkrar slóðir:

Ríkisútvarpið á Netinu   http://www.ruv.is

Fögnuður   http://www.ruv.is/gaman

Vitinn   http://www.ruv.is/vitinn

Vefurinn um Jón Leifs    http://www.jonleifs.is

Íslandssöguvefurinn   http://www.ruv.is/saga

Landsamtök lífeyrissjóða    http://www.ll.is