Háskólakennari í tölvunarfræðiskor

Ég fór að vinna hjá Háskóla Íslands 1991 eftir að ég kom heim frá Bandaríkjunum þar sem ég var í framhaldsnámi við Rensselaer Polytechnic Institute. Starfið skiptist í þrjá þætti: kennslu, rannsóknir og stjórnun. Aðalkostirnir við þetta starf er að það er fjölbreytt, skapandi, hvetjandi og ég hef samskipti við mjög marga bæði innanlands og utan. Einnig finnst mér kostur að ég ræð mínum verkefnum talsvert sjálf sem getur reyndar einnig verið vandasamt því það krefst skipulags.

Kennsla

Tölvunarfræðiskor býður upp á þrjár gráður, B.S. nám í tölvunarfræði (90 einingar), Diplóm nám í Rekstri tölvukerfa (45 einingar) og M.S. nám í tölvunarfræði (45 einingar). Námið samanstendur yfirleitt af skyldunámskeiðum og valnámskeiðum sem nemandi getur einnig valið úr öðrum deildum Háskóla Íslands með samþykki skorar.

Á liðnu vormisseri kenndi ég nemendum stýrikerfi og fór í innviði tölvustýrikerfa. Þetta er undirstöðunámskeið í tölvunarfræði en hér sjá nemendur hvernig stýrikerfið er hlíf forritarans eða notandans fyrir vélbúnaði tölvunnar og netsins. Nemendur kynnast stýrikerfinu eins og hverju öðru hugbúnaðarkerfi sem gera þarf kröfur til eins og öryggi, áreiðanleika, nytsemi, virkni og afkasta. Í þessu námskeiði eru rúmlega fimmtíu nemendur. Þeir sækja fyrirlestra en einnig dæmatíma í minni hópum. Lögð er áhersla á hópvinnu þar sem nemendur vinna að forritunarverkefnum í Java. Nemendur kynnast stýrikerfum eins og Windows NT, Linux, Mach örkjarnann, og einnig stýrikerfum fyrir ívafin kerfi. Vefurinn er talsvert notaður í þessu námskeiði sem öðrum og í vetur gerðum við tilraun með umræður á vefnum og spjallrásir.

Einnig kenndi ég á vormisserinu námskeiðið Gagnagrunnar og dreifð upplýsingakerfi. Námskeiðið er fyrir nemendur í meistara námi en þetta er annar veturinn sem við bjóðum upp á M.S. nám og hefur það farið vel af stað. Sjö nemendur tóku þátt í námskeiðinu. Í fyrri helmingi námskeiðsins er fjallað um vöruhús gagna en í seinni helmingi þess er farið í dreifða vinnslu.

Á haustmisserinu kenndi ég M.S. nemendum námskeið sem nefnist Samskipti manns og tölvu. Nemendum eru kynntar takmarkanir og geta mannsins í samskiptum við tölvu. Áhersla er á notendamiðaða hönnun og þróun. Skoðuð er þróun samtals á milli manns og tölvu og hvernig viðmótið er hannað út frá því. Í notendamiðaðri þróun gefur notandinn álit sitt á tölvukerfinu, frá upphafi, þ.e. þegar verið er að ákveða hvað tölvukerfið á að gera og allt til loka þróunar, þegar verið er að prófa hversu gagnlegt það er, hversu auðvelt er að læra á það og hversu fljótur notandinn er að beita tölvukerfinu.

Rannsóknir

Undanfarin ár hef ég tekið þátt í innlendum og erlendum rannsóknarverkefnum. Í verkefnunum vinn ég með fyrirtækjum og stofnunum að fyrirfram ákveðnum rannsóknarmarkmiðum. Markmiðin eru af hagnýtum toga og miðast oft við að finna nýjar aðferðir í tölvunarfræði, meta hve vel áður þekktar aðferðir reynast, eða bera saman aðferðir. Í tengslum við flest rannsóknarverkefnin kynni ég markmið og niðurstöður, bæði fyrir fræðimenn og almenning. Þá ferðast ég á ráðstefnur til að kynna verkefnin eða til að hitta samstarfsfólk á vinnufundum í verkefnunum. Verkefnin eru styrkt af sjóðum, svo sem RANNíS, Rammaáætlunum Evrópusambandsins, Norrænu ráðherranefndinni, Háskóla Íslands og fyrirtækjum. Verkefnin veita mér tækifæri til að stunda rannsóknir í samstarfi við erlenda og innlenda tölvunarfræðinga og einnig fólk af öðrum rannsóknasviðum svo sem verkfræði, viðskiptafræði og stærðfræði. Nemendur taka þátt í þessum verkefnum, annað hvort í hlutastarfi, sumarstarfi eða í lokaverkefnum.

Þau rannsóknarverkefni sem ég er að vinna að núna á Kerfisverkfræðistofu eru ESPICE, en markmið þess er að styðja íslensk fyrirtæki í að endurbæta hugbúnaðargerð. Þessu verkefni lýkur í haust en þá verður haldin alþjóðleg ráðstefna í Reykjavík: Views on Software Development in the New Millenium Í vetur var ég að vinna að verkefni um Bráðaviðvaranir um jarðvá í samstarfi við Veðurstofuna og Stefju. Nýlega hófst alþjóðlegt verkefni sem nefnist UNIVERSAL (UNIVERSAL Exchange for Pan-European Higher Education) en markmið þess er að veita fjarkennslu á alþjóðavísu. Háskólar víðs vegar í Evrópu munu bjóða upp á styttri eða lengri námskeið í fjarkennslu. Þróaður verður sérstakur námsefnismiðlari og gerðar tilraunir með hann. Háskóli Íslands tekur þátt í verkefninu ásamt Landsímanum. Áður hafði ég tekið þátt í verkefni sem fjallaði einnig um fjarkennslu og að auki um fjarlækningar. Í því verkefni var Háskóli Íslands í samstarfi við Háskólann á Akureyri og Landspítala.

Stjórnun

Fyrir utan verkefnastjórnun, er kennurum Háskóla Íslands skylt að sinna öðrum stjórnunarstörfum. Það er mjög misjafnt hve þetta er mikill hluti af starfinu. Kennarar í tölvunarfræðiskor skiptast t.d. á tvö ár í senn að vera formenn skorarinnar. Þetta getur verið æði annasamt, því í því felst aukin samskipti við nemendur, mannaráðningar, fjármálastjórnun og samskipti við aðrar skorir, svo eitthvað sé nefnt. Oft eru kennarar beðnir um að lesa yfir greinar sem eiga að fara til birtingar í tímarit eða ráðstefnur og meta umsóknir um rannsóknarverkefni. Einnig erum við beðin um að sitja í nefndum, þar sem krafist er fagþekkingar á okkar sviði.

Vefslóðir

Ebba Þóra Hvannberg  http://www.hi.is/~ebba
Tölvunarfræðiskor
ESPICE