Kennsluferill

Ég er fædd í Vestmannaeyjum, 19. október 1951 og er yngst af fjórum systkinum. Móðir mín var fædd hér í Vestmannaeyjum, en pabbi minn fæddist og ólst upp að Núpi á Berufjarðarströnd. Ég er gift Friðriki Jóhannssyni og eigum við 3 börn. Ég tók landspróf frá Gagnafræðaskóla Vestmannaeyja og síðan lá leiðin í Kennaraskólann, þar sem ég útskrifaðist vorið 1971.

Strax þá um haustið réð ég mig til kennslu við gamla skólann minn, Barnaskóla Vestmannaeyja, og hef stundað þar kennslu síðan, utan skólaárið 1992-1993, en þá kenndi ég við Barnaskóla Akureyrar.

Vorið 1991 fengum við kennararnir í Barnaskóla Vestmannaeyja til okkar námskeið á vegum Tölvu-og verkfræðiþjónustunnar þar sem kennd voru undirstöðuatriði tölvunotkunar. Má segja að á því námskeiði hafi maður smitast af einshverskonar "tölvu-bakteríu" sem maður hefur ekki losnað við síðan.

Tölvusamskipti

Árið sem ég kenndi við Barnaskóla Akureyrar kynntist ég tölvusamskiptum í fyrsta sinn. Sótti þá um haustið eins og lög gera ráð fyrir Kennaraþing BKNE sem haldið var á Laugum í Þingeyjarsýslu. Þar, í lítilli kennslustofu uppá lofti, sat ég svo ógleymanlega kynningu Péturs Þorsteinssonar skólastjóra á Kópaskeri, á menntanetinu, tölvusamskiptum og öðru því tengdu.

Það má kannski segja að þarna hafi örlög mín ráðist, því ég þóttist strax sjá hversu ótæmandi möguleika þetta gæti gefið manni bæði í kennslu og til einkanota ef maður hefði þessa tækni á valdi sínu og síðan hef ég verið á kafi í að tileinka mér þessa tækni og jafnframt nota hana með nemendum mínum.

Til dæmis erum við í Barnaskóla Vestmannaeyja núna að ljúka þriðja árinu í Comeniusarverkefni sem við höfum tekið þátt í ásamt skóla á Írlandi og í Svíþjóð. Vorið 1994 fór ég á námskeið um Kidlink- samskiptaverkefnið og tók í framhaldi af því þátt í afmælishátíð Kidlinks á irkinu með nemendum mínum þá um vorið, og síðan hafa ýmis Kidlink-verkefni fylgt í kjölfarið. Kidlink verkefnið er alþjóðlegt samskiptaverkefni sem rekið er af sjálfboðaliðum og áhugafólki um tölvusamskipti.

Stjórnandi í Kidlink

Í dag er ég aðstoðarstjórnandi íslenska svæðisins og sé einnig um íslensku verkefnin ásamt Hildu Torfadóttur, tölvukennara í Síðuskóla á Akureyri. Við Hilda höfum einnig samið nokkur verkefni fyrir Kidlink, aðallega á íslensku en þó einnig á ensku. Enska verkefnið heitir Virtual Vacation og er hluti af stærra verkefni sem heitir "Who am I " og þessa dagana erum við að semja tvo hluta af ensku verkefni innan Kidlink sem heitir "I Have a Dream". Ég hef sótt nánast öll þau námskeið sem í boði hafa verið hjá Íslenska menntanetinu og einnig hef ég reynt að sækja eins mörg endurmenntunarnámskeið um tölvur og tölvunotkun og ég hef framast getað. Einnig hef ég kennt samskiptanámskeið hjá Íslenska menntanetinu svo og nokkur endurmenntunarnámskeið í tölvunotkun fyrir kennara.

Þegar svo kennaraháskólinn auglýsti framhaldsnám í Tölvu-og upplýsingatækni haustið 1998 ákvað ég að skella mér í það og er núna að ljúka öðru ári í náminu. Ég hef fengið námsleyfi næsta haust og stefni að því að ljúka mastersnámi með áherslu á tölvu og upplýsingatækni sumarið 2001, ef Guð lofar.

Ég hef eytt ómældum tíma fyrir framan tölvuna síðan ég fór á fyrsta tölvunámskeiðið vorið 1991. En ég sé ekki eftir þeim tíma, því í viðbót við þá þekkingu sem ég hef öðlast, hef ég eignast fjöldann allan af vinum og kunningjum út um allan heim í gegnum tölvusamskipti. Það er ómetanlegur fjársjóður.

Vefslóð

Heimasíðan mín (http://www.ismennt.is/vefir/eyglob/

Skólinn minn http://vestmannaeyjar.ismennt.is

Comeniusarverkefni -skólans http://vestmannaeyjar.ismennt.is/vefir/comenius/island.html

Kidlink http://www.kidlink.org

Kidlink-verkefnin á íslenska svæðinu http://www.kidlink.org/islenska/kidproj-islenska/kidproj1.html

Virtual Vacation http://www.kidlink.org/kie/nls/english/vacation/index.html