Kristín Guðmundsdóttir stundar framhaldsnám í tölvu- og upplýsingatækni. Hún hefur unnið við tölvukennslu og tölvuleiðsögn í meira en áratug og er einnig með sjálfstæðan rekstur í vefsíðugerð og vefumsjón. Kristín og dóttir hennar Sesselja G. Vilhjálmsdóttir reka saman vefsetrið www.konur.is sem sérhæfir sig í efni fyrir konur.

Námsferill og fyrstu kynni af tölvum

Um þessar mundir stunda ég framhaldsnám í fjarnámi í tölvu- og upplýsingatækni við Kennaraháskóla Íslands. Árið 1994 stundaði ég framhaldsnám í námsráðgjöf við Háskóla Íslands. Árið 1983 lauk ég B.A. prófi í heimspeki og sögu frá Háskóla Íslands og ári seinna lauk ég uppeldis- og kennslufræði frá sama skóla. Ég kynntist tölvu fyrst árið 1984 þegar eiginmaður minn keypti tölvu til að færa tölvubókhald.

Ári seinna var ég í fæðingarorlofi og sótti tíma í listasögu mér til ánægju. Ég átti að skrifa ritgerð og engin ritvél var á heimilinu en tölvan var til staðar. Ég ákvað að nota tækifærið og læra ritvinnslu með því að skrifa ritgerðina. Ég kunni ekkert á tölvu en hafði verið í Verslunarskólanum og var vön að vélrita. Ég fann ljósrit með einföldum leiðbeiningum. Það var byrjunin. Ég áttaði mig fljótlega á möguleikum tölvunnar og útvegaði mér handbækur um tölvur og fiktaði mig áfram þegar ég var ekki að gefa barninu brjóst eða að þvo bleyjur. Ári seinna kenndi ég í grunnskóla og sótti þá þriggja mánaða tölvunámskeið við KHÍ. Þegar námskeiðinu lauk, notaði ég frístundir mínar til að skoða ritvinnslu, töflureikni og stýrikerfi.

Tölvukennsla á ýmsum skólastigum

Haustið 1987 varð ég kennari í tölvufræði við Verslunarskólann. Sumarið áður tileinkaði ég mér forritunarmálið TrueBasic eftir bestu getu og um haustið hóf ég að kenna forritun. Ég verð að viðurkenna að veturinn sá var nokkuð strembinn. Eftir að ég hætti að kenna við Verslunarskólann tók ég þátt í tilraunaverkefni um tölvuþjálfun fatlaðra barna sem Salvör Gissurardóttir lektor við KHÍ og Sigrún Jóhannsdóttir hjá Tölvumiðstöð fatlaðra höfðu umsjón með. Þar kenndi tölvunotkun í sérdeild grunnskóla fram á vor sama ár. Við voru fimm konur sem tókum þátt í verkefninu ásamt umsjónamönnum verkefnisins. Sama ár tók ég við nýju starfi í tölvudeild, Skrifstofu Alþingis og hlutverk mitt var meðal annars að skipuleggja og kenna á tölvunámskeiðum fyrir alþingismenn. Ég hef kennt tölvu- og upplýsingatækni við Kennaraháskóla Íslands frá 1998, jafnframt því sem ég hef kennt á endurmenntunarnámskeiðum hjá Símenntunarstofnun KHÍ og Endurmenntunarstofnun HÍ.

Mægðurnar Kristín og Sesselja
reka vefsetrið www.konur.is

Ég og eldri dóttir mín sem er á fimmtánda ári höldum utan um um vefsetrið http://www.konur.is. Við mæðgur tökum einnig að okkur heimasíðugerð og ýmiss konar vefverkefni fyrir fyrirtæki og einstaklinga. Ég vinn við tölvuna daglega, sæki tölvupóstinn, vinn við vefsíðugerð eða er að undirbúa kennslu. Tvö eldri börnin mín eru vön tölvunotkun. Sonur minn er kerfisfræðingur og er verkefnastjóri og forritari við upplýsingadeild Landsbankans. Eldri dóttir mín heldur utan um um stelpusíðuna á vefsetrinu konur.is og notar tölvuna daglega, í tengslum við heimanám eða sér til ánægju. Yngri stelpan sem er á tíunda ári er töluvert í leikjum og er núna rétt að byrja að fóta sig á Internetinu, er með netfang, notar ritvinnslu og vinnur í myndvinnsluforritum fyrir börn.

Vefslóðir

KONUR.IS