Kristín Ósk Hlynsdóttir er vefstjóri hjá Glitni og stundar framhaldsnám í upplýsingastjórnun í fjarnámi við breskan háskóla. Hún hefur unnið að ýmsu sem tengist Internetinu.

Leiðin lá þrátt fyrir allt í bókasafns- og upplýsingafræði

Menntaskólaárin mín voru sennilega frekar óvenjuleg. Einum fjórða hluta eyddi ég í enskum skóla í Jerúsalem, öðrum í amerískum skóla rétt hjá Tel Aviv, þeim þriðja í Menntaskólanum á Akureyri og þeim síðasta í Menntaskólanum við Hamrahlíð þaðan sem ég útskrifaðist 1988.

Eftir að ég kom heim vann ég á sumrin á Bókasafni Kópavogs en ekki tókst að sannfæra mig um að velja bókasafnsfræðina í háskólanum. Mér þótti mjög gaman að vinna á safninu en þrjóskaðist við og fór í sálfræði haustið 1989. Ég gafst fljótlega upp á sálfræðinni og fór að vinna á lögmannsstofu. Þar vann ég þar til yngri dóttirin fæddist haustið 1994.

Ég var aldrei sátt við að hafa gefist upp í háskólanum og settist niður með kennsluskrána og ákvað að ég skyldi nú standa mig. Bókasafns- og upplýsingafræðinni tókst loks að heilla mig því lýsingar á námskeiðunum höfðuðu virkilega til mín, sérstaklega tölvunámskeiðin. Ég sótti kynningu í skólanum og haustið 1995 settist ég aftur á skólabekk. Eldri dóttirin var á þriðja ári og sú yngri nýorðin eins árs. Fjölskyldan lagðist á eitt til að allt gengi nú upp og pabbinn og móðuramman voru tekin í dýrðlingatölu.

Á öðru ári fékk ég Internetið beint í æð og þar með var ekki aftur snúið. Ég gerði mína fyrstu heimasíðu á einu námskeiðinu um leikskólana í heimabænum Kópavogi. Af gamni mínu held ég síðunni ennþá við nánast í sinni upprunalegu mynd.

Í framhaldinu tók ég öll námskeið sem ég gat sem tengd voru Internetinu og þegar ég ákvað að skrifa BA ritgerðina vorið 1997 kom ekkert annað til greina en að tengja hana áhugasviðinu. Ritgerðin fólst í þarfagreiningu fyrir Upplýsingavef Kópavogsbæjar og var unnin í góðri samvinnu við bæinn. Þann 17. júní 1998 útskrifaðist ég svo frá HÍ með BA próf í bókasafns- og upplýsingafræði til 90 eininga.

Félagsstörfin

Á fyrsta ári í HÍ tók ég sæti í námsnefnd í bókasafns- og upplýsingafræði og árið eftir var ég formaður nemendafélagsins í greininni. Á lokaárinu var ég svo nemendaráðgjafi. Þetta var frábær reynsla sem hefur nýst mér ekki síður en námið. Þegar náminu lauk tók ég sæti í ritnefnd tímaritsins Bókasafnið, í stjórn Bókavarðafélags Íslands og þjónaði skyldum gjaldkera Félags bókasafnsfræðinga í rannsóknarbókasöfnum. Félögin tvö voru svo sameinuð í eitt sem stofnað var nú um árþúsundamót. Sæti mitt í ritnefnd Bókasafnsins er það sem ég hef notið hvað mest. Áslaug Agnarsdóttir, ritstjóri ákvað að gefa blaðið út á Netinu í fyrra og var það ástæðan fyrir því að mér var boðið í hópinn en ég tók sæti umsjónarmanns netútgáfu.

Bókasafns- og upplýsingafræðingurinn og vefstjórinn

Með náminu vann ég á bóka- og skjalasafni Landsvirkjunar og fólst starfið þar fyrst um sinn í skráningu gagna, upplýsingaþjónustu og umsjón með heimasíðu bókasafnsins sem til að byrja með var aðeins aðgengileg á einni tölvu á safninu. Farið var af stað með innranet Landsvirkjunar í framhaldinu og tók ég þátt í þróun þess. Ég fór fljótlega að kenna starfsmönnum notkun Internetsins og var það með skemmtilegri þáttum starfsins. Smátt og smátt færðist ég frá hefðbundnum bókasafnsstörfum yfir í vefstjórastarfið. Það var frábær reynsla að fá að taka þátt í endurhönnun og skipulagi heimasíðu Landsvirkjunar.

Í september 1998 setti ég af stað póstlista sem nefnist Spuni og er ætlaður bókasafns- og upplýsingafræðingum og öðrum sem áhuga hafa á vefsmíðum. Ein af ástæðunum fyrir því að ég setti Spuna af stað er sú að vefstjórastarfið er mjög sérhæft og oft ekki við marga að ráðskast innan húss. Þess vegna er gott að geta gripið til þess að senda póst út á Spuna þegar spurningar vakna. Að Spuna eru nú rúmlega 130 áskrifendur (spuni@hi.is).

Símenntun

Síðasta haust settist ég svo aftur á skólabekk og nú í Brighton á Englandi. Stefnan er tekin á að ljúka MA í upplýsingastjórnun í fjarnámi árið 2002. Nú um miðjan febrúar á nýju árþúsundi hóf ég störf sem vefstjóri hjá Glitni . Þar með hef ég gjörbreytt um umhverfi og áherslurnar allt aðrar. Glitnir er á samkeppnismarkaði og mikil áhersla lögð á að fylgjast með þróun mála á Netinu. Framundan er spennandi vinna og nám sem ekki sér fyrir endann á þegar Netið er annars vegar.

Vefslóðir

Glitnir  www.glitnir.is

Landsvirkjun    www.lv.is

Fyrsta heimasíðan (fyrir leikskólana í Kópavogi)

Tímaritið bókasafnið   www.bokasafnid.is