Lára Stefánsdóttir stýrir tölvudeild Menntaskólans á Akureyri sem er þróunarskóli í upplýsingatækni. Hún hefur verið tölvukennari og tók þátt í að stofna Íslenska menntanetið og starfaði þar. Lára hefur stýrt mörgum alþjóðlegum verkefnum á sviði tölvusamskipta m.a. Kidlink og haldið fyrirlestra og námskeið víða um heim.

Fyrstu kynni af tölvum

Ég kynntist tölvum fyrst 1981, þá var ég að vinna hjá Söluumboði LÍR við innflutning og pantanir á raflagnaefni. Engin forrit virkuðu, drifin ofhitnuðu svo það þurfti að kaupa sérstakar viftur til að blása á þau og disklingarnir voru hlemmistórir. Við réðum forritara og hann lagaði forritin en mér þótti vinna hans rándýr þó hann væri skemmtilegur og lagaði flest forritin – að lokum. Ég varð að segja honum hvað forritið átti að gera, bíða síðan eftir að hann lagaði það og enn lengri bið eftir keyrslu til að sjá hvernig forritið virkaði. Því fannst mér að á meðan beðið væri eftir keyrslunni hefði blessaður forritarinn ekkert betra að gera en kenna mér forritun.

Stofnun Íslenska menntanetsins

Ég tók síðar próf í Tölvuháskóla VÍ, uppeldis- og kennslufræði í HÍ, diplómupróf í KHÍ í uppeldis- og menntunarfræðum og er að vinna að rannsókn á þeim breytingum sem eiga sér stað í menntun þegar upplýsingatækni er notuð. Ég kenndi í Fjölbrautaskólanum við Ármúla 1988-1993 og sá um tölvukerfið.

Árið 1990 heillaðist ég af Internetinu eftir að Pétur Þorsteinsson færði mér netfang að gjöf, eins og hann væri að færa mér fjársjóð. Ég hafði engan áhuga á því til að byrja með en þegar möguleikarnir komu í ljós var ekki aftur snúið. Þarna var hægt að kynnast og vinna með fólki víða að úr heiminum. Ég tók því þátt í því með honum og tveimur öðrum að stofna Íslenska menntanetið sumarið 1992. Við tengdum þá yfir 90% af skólum en það þýddi ekki að svo margir kennarar eða jafnvel skólar notuðu það yfirleitt.

Stjórnandi í Kidlink
Fyrirlestrar og námskeið

Kidlink samskiptaverkefnið á Internetinu er gríðarlega gott fyrir nemendur og kennara og byrjaði ég að stjórna þemaverkefnum hjá þeim árið 1992 og fór síðan í yfirstjórn 1995. Þar lærði ég að stjórna alþjóðaverkefni á neti með fólki frá mismunandi menningarheimum og það leiddi til mikilla vangaveltnakostaði um hvað hlutirnir þýða í raun og veru á mismunandi stöðum.

Mikill áhugi var á því sem var að gerast á Íslandi í tengslum við Internetið og menntun og því jókst gríðarleg ásókn í að fá fyrirlestra og ráðgjöf héðan. Ég hef því flutt fyrirlestra og haldið námskeið víða um heim, í Suður og Norður Ameríku ásamt Evrópu.

Árið 1995 tók ég þátt í undirbúningi og stofnun Norræna skólanetsins sem Norðurlandaþjóðirnar stóðu að.

Flutti í dreifbýlið

Eins og svo margir sem vinna mikið á Netinu þráði ég að flytja í dreifbýlið sem tókst sumarið 1996 þaðan sem ég gat haldið áfram að vinna sjálfstætt. Eftir fimm ár við að kenna kennurum, halda fyrirlestra og veita ráðgjöf var viskubrunnurinn eiginlega tómur. Einnig vildi ég vinna með fólki í því samfélagi sem ég bjó. Ég tók við tölvudeild Menntaskólans á Akureyri sem er þróunarskóli í upplýsingatækni. Þar er gríðarlega áhugasamt og duglegt fólk á sviði upplýsingatækni og samstarf við þau fyllir tankana svo sannarlega hratt aftur.

Vefslóð

Menntaskólinn á Akureyri  www.ma.is