Forlögin

Þegar ég lít til baka þá voru fyrstu kynni mín af tölvum alls ekki skipulögð af minni hálfu. Það voru frekar forlögin sem leiddu okkur saman.

Fyrstu kynnin

Ég var ekki að hugsa um tölvukennslu þegar ég valdi að fara í Versló á sínum tíma en áhugi minn á tölvum kviknaði strax og ég fór í fyrsta tölvutímann hjá Baldri Sveinssyni. Frá upphafi fannst mér tölvurnar mjög forvitnilegar og forritunin heillaði mig upp úr skónum. Það var því ekki spurning um að velja fleiri tölvutíma þegar þeir hættu að vera skylda í Versló.

Á ég að fara í tölvunarfræði?

Ákvörðunin um að fara í tölvunarfræði í HÍ var ekki sjálfgefin. Ýmsar hugsanir fóru í gegnum kollinn á mér þegar ég var að gera upp hug minn. Meðal annars man ég eftir að ég taldi mig eiga á brattann að sækja í stærðfræðinni sem er kennd í tölvunarfræðinni. Auk þess þekkti ég ekki hræðu sem ætlaði að fara í þetta nám því vinkonur mínar úr Versló ætluðu í viðskiptafræði. Á hinn bóginn langaði mig að læra meira um undraheima tölvunnar og forritun. Einnig hvöttu námsráðgjafarnir mínir, mamma og pabbi, mig til að fara í tölvunarfræðina. Þau töldu að tölvurnar væru framtíðin og fyrst ég hefði áhuga á tölvum væri tilvalið að læra meira um þær og atvinnutækifærin yrðu næg þegar ég kláraði skólann. Nú voru góð ráð dýr, átti ég að láta stærðfræðihræðslu mína hrekja mig frá því sem mig langaði mest til að gera og gæfi mér góða atvinnu- og tekjumöguleika í lok náms? Nei, ég ákvað að fara í tölvunarfræðina og láta reyna á hæfni mína í tölvunarfræðum og stærðfræði. Ég kláraði síðan tölvunarfræðina í HÍ og þeirri ákvörðun minni að fara í tölvunarfræði í HÍ hef ég aldei séð eftir. Námið var skemmtilegt og hefur reynst mér góður grunnur fyrir þau störf sem ég hef unnið frá því ég útskrifaðist árið 1989.

Bandaríkin og Mjólkursamsalan

Ég hætti ekki skólagöngu minni eftir tölvunarfræðina heldur fór ég til Bandaríkjanna og tók MBA (Master of Business Administration) gráðu. Ástæðan fyrir því að ég tók ekki meistaragráðu í tölvunarfræðum er löngun mín að nýta upplýsingatæknina á sem hagkvæmastan máta í fyrirtækjum. Viðskiptafræðigráðan frá Bandaríkjunum hefur reynst mér góð og hagnýt viðbót við tölvunarfræðina frá HÍ.

Ég hef ekki starfað við forritun frá því að ég kom frá Bandaríkjunum. Um tíma starfaði ég hjá Glitni og vann ýmis verkefni tengd tölvumálum. Eftir það starfaði ég í þrjú ár hjá Mjólkursamsölunni og var forstöðumaður tölvudeildar. Þar bar ég ábyrgð á rekstri upplýsingakerfis fyrirtækisins og vann þau verk sem vinna þurfti. Verkefnin voru æði margvísleg, til að mynda notendaaðstoð í ýmsum forritum, fundasetur, greiningarvinna, val á tölvukerfum, stefnumótun, áætlanagerð, verkefnastjórnun, samskipti við verktaka og sölumenn auk stýringar á verkefnum innan deildarinnar.

Áhugasvið og ráðgjafavinna

Áhugasvið mitt er að finna lausnir og leiðir til að koma upplýsingatækninni í notkun innan fyrirtækja. Fellur þessi áhugi minn vel að starfi mínu sem ráðgjafi í upplýsingatækni hjá Tölvu- og verkfræðiþjónustunni. Ráðgjafavinnan felst í margvíslegum verkefnum er tengjast upplýsingatækni. Má þar nefna úttektir á tölvumálum fyrirtækja og stefnumótun, aðstoð við stjórnun tölvumála í fyrirtækjum, greiningarvinnu fyrir hugbúnaðarverkefni af ýmsum toga, verkefnastýringu og samningagerð. Verkefnin sem ég vinn eru mjög fjölbreytt og því er vinnan skemmtileg. Verkefnin fela í sér mikil mannleg samskipti, úrvinnslu upplýsinga og skýrslugerð auk þess sem nauðsynlegt er að fylgjast með því sem er að gerast í tækninýjungum og breytingum í viðskiptaumhverfinu.

Við gefum strákunum ekkert eftir

Forlögin sem leiddu mig og tölvurnar saman hafa haft margvísleg áhrif á líf mitt. Til dæmis er ég í tveimur saumaklúbbum með kunningjakonum úr tölvunarfræðinni sem hittast reglulega og ræða allt milli himins og jarðar (fyrir utan hannyrðir). Þar er m.a. reglulega umræða af hverju það eru ekki fleiri konur í þessu fagi sem okkur finnst svo skemmtilegt, a.m.k. hefur engin okkar söðlað um og snúið sér að öðru. Ekki kann ég neitt einhlítt svar við þessari áleitnu spurningu. Ég get þó ekki varist þeirri hugsun að ungar konur haldi að tölvu- og upplýsingatæknin sé flóknari en hún er og svo sé þetta eitthvað fyrir strákana. Hitt er víst að við stelpurnar sem völdum tölvunarfræðina á sínum tíma gefum strákunum ekkert eftir í okkar fagi.

Vefslóð

Tölvu- og verkfræðiþjónustan (www.tv.is)