Margrét Dóra Ragnarsdóttir vinnur hjá OZ við allt sem viðkemur samskiptum manns og tölvu í því sem fyrirtækið framleiðir. Hún lauk háskólanámi í sálfræði og stundar nú framhaldsnám í tölvunarfræði. Margrét Dóra hefur verið virkur netverji í mörg ár. Hún hefur mikinn áhuga á gervigreind.

Komið út úr nördaskápnum

Það hafði alltaf blundað í mér svolítill nörd. Til dæmis þótti mér gífurlega skemmtilegt að fást við forritun á mínu fyrsta ári í Verzló undir handleiðslu Baldurs Sveinssonar. Ég streittist þó lengi á móti og þegar stúdentsprófi lauk hóf ég nám í sálfræði við Háskóla Íslands. Þangað komin ætlaði ég að læra hvernig ég gæti gert öðrum gott með sálfræðimeðferð. Það varð því nokkurt áfall fyrir mig þegar ég, eftir 3 ára nám, komst að því að ég gæti ekki hugsað mér að gegna þessu starfi. Að vinna hálft sumar á Kleppi var alveg meira en nóg fyrir mig. Sálfræði er sem betur fer mjög breitt svið. Fagið telur ekkert mannlegt sér óviðkomandi. Það gerir það að traustum grunni fyrir nokkurn veginn hvaða svið sem er þar sem við þurfum jú að fást við annað fólk daglega.

Það var í leit minni að góðri byggingu ofan á þennan grunn að ég kynntist gervigreind og starfi Helgu Waage hjá OZ. Hún réði mig til sín og þar með var ég ákveðin; ég skyldi læra um gervigreind. Gervigreind er þverfaglegt rannsóknarfag sem heimspeki, sálfræði og tölvunarfræði koma að.

Framhaldsnám í tölvunarfræði

Til að búa mig undir umsókn til erlends háskóla í þessum fræðum fannst mér að ég þyrfti að vera með einhverja tölvumenntun. Þarna spilaði líka inn í að ég hafði verið virkur netverji í nokkur ár og var að sætta mig við tilhugsunina um mig sem nörd en ekki týpíska Verzlópíu. Það voru margar leiðir opnar fyrir mig til að afla mér tölvuþekkingar. Háskóli Íslands, Háskólinn í Reykjavík (þá Tölvuháskóli Verzlunarskóla Íslands), Rafiðnaðarskólinn og ýmsir fleiri buðu upp á allt frá einstökum námskeiðum til háskólagráðu í faginu.

Það var því úr vöndu að ráða. Ætti ég að taka nokkur námskeið eða bæta við mig háskólagráðu? Hvað vildi ég eyða miklum tíma í þetta sem átti að vera bara til að gera mig að líklegri kandídat við erlendan háskóla? Meðan ég íhugaði þetta kom tilkynning frá tölvunarfræðiskor Háskóla Íslands um að þeir væru að bjóða í fyrsta sinn upp á M.S. nám í faginu. Þetta fannst mér ekki geta átt við mig þar sem ég hafði ekki neina tölvumenntun en prófessor Jörgen Pind við sálfræðiskor og prófessor Oddur Benediktsson við tölvunarfræðiskor hvöttu mig til að sækja um og sjá hvort ég fengi inngöngu. M.S. námið var enn í mikilli mótun og þar á meðal átti eftir að ákveða hvort hleypa mætti fólki inn í námið með allt annan bakgrunn en B.S. í tölvunarfræði (eða skyldum greinum) gegn ákveðnum forkröfum.

Eftir nokkurt þóf var ég samþykkt inn í námið og hóf mitt fornám haustið 1998, sama ár og ég útskrifaðist úr sálfræðinni. Þetta gerir mér kleift að bæta við mig hærri gráðu á a.m.k. 2 og ½ ári (þó hugsa ég að þetta verði lengra hjá mér). Ég var sem sagt orðin fullgildur nörd. Mín fyrstu námskeið í meistaranáminu hittu beint í mark hjá mér. Þetta voru tvö námskeið sem bæði fjölluðu um samskipti manns og tölvu en annað var kennt við tölvunarfræðiskor, hitt við sálfræðiskor. Þetta þótti mér sérstaklega spennandi með tilliti til gervigreindarinnar en mig óraði ekki fyrir því að þetta væri að öðru leyti spennandi.

Vinna hjá OZ.COM

Mér tókst samt að sannfæra OZ.COM að það væri í þeirra hag að hafa mig innanhúss meðan ég væri í þessu námi svo ég gæti nýtt mér þekkingu mína um leið og hún yrði til. Það fór því svo að um síðustu áramót fékk ég stöðu hjá OZ.COM sem framleiðslustjóri (Product Manager) með sérstaka áherslu á samskipti manns og tölvu. Þar felst mitt starf í því að vera fulltrúi notenda í hópi hönnuða. Ég fer yfir þarfagreiningar- og viðmótshönnun með tilliti til þess hvernig þetta kemur notandanum fyrir sjónir. Og ég hef yndi af starfinu mínu. Mér finnst þetta verulega spennandi (og vanrækt svið) sem hugbúnaðarfyrirtæki eru að gera sér æ betur grein fyrir að er nauðsynlegt að sinna ef þau vilja ná árangri með hugbúnaði sínum. Þarna get ég nýtt mér þekkingu mína bæði úr sálfræði og tölvunarfræði sem sýnir kannski ágætlega að hugbúnaðarþróun snýst um miklu meira en forritun.

Vefslóðir

Margrét Dóra Ragnarsdóttir  www.hi.is/~mdr
OZ.COM