Ég heiti Dóra Fjölnisdóttir og er 25 ára, í sambúð og barnlaus. Ég varð stúdent frá MR 1994 af náttúrufræðibraut og er nú að ljúka öðru ári í kerfisfræði við Háskólann í Reykjavík. Ég var ekki ákveðin hvað ég vildi gera eftir stúdentspróf og eyddi því tíma í að ferðast og vinna í ferðabransanum. Haustið 1998 fannst mér vera kominn tími til að mennta mig frekar. Mér fannst námið við Háskólann í Reykjavík vera góður kostur þar sem um tveggja ára hnitmiðað nám var að ræða með góða atvinnu- og launamöguleika að námi loknu.

Ég hef alltaf haft áhuga á stærðfræði og öðrum raungreinum en tek það fram að ég hafði nánast ekkert komið nálægt tölvum áður og hafði engan grunn. Ég gerði mér grein fyrir því að þetta yrði mikil vinna og sú varð raunin, ég hef átt afskaplega takmarkað félags- og fjölskyldulíf undanfarna tvo vetur því nær allur minn tími hefur farið í námið. Ég hef fundið mig mjög vel í þessu námi og hef fengið gríðarlegan áhuga á forritun og öllu sem viðkemur tölvum. Þótt ég hafi í upphafi einungis ætlað í tveggja ára nám þá hef ég hugsað mér að taka þriðja árið og klára BS gráðuna í tölvunarfræði með viðskiptafræði sem aukagrein. Ég sé ekki eftir því að hafa farið í þetta nám og vil meina að það sé fyrir alla sem hafa vilja og áhuga, ekki bara tölvunörda.