Leiðin í gegnum námið

Þegar ég var í grunn- og menntaskóla, þá hafði ég engan sérstakan áhuga á námi. Ég var bara meðal námsmaður sem lærði ekki meira en hann þurfti og reyndi að sleppa eins auðveldlega út úr náminu og ég gat.

Ég lauk stúdentsprófi úr stærðfræðideild frá Menntaskólanum í Reykjavík vorið 1994 og byrjaði sama haust í Kennaraháskóla Íslands. Þá var eins og allt breyttist, ég fékk mikinn áhuga á öllu sem var verið að kenna enda var þetta nám alveg einstaklega fjölbreytt og skemmtilegt. En fljótlega áttaði ég mig samt á því að ég myndi aldrei sætta mig við þessi lágu laun miðað við þá vinnu sem fer í að undirbúa kennslu. Ég ákvað samt að klára skólann því að námið átti einstaklega vel við mig og ég vissi ekki alveg hvað ég ætti að leggja fyrir mig.

Fram að þessum tíma var ég haldin tölvufóbíu. Ég reyndi að forðast tölvur eins og ég gat og fannst alveg ferlegt ef skila þurfti ritgerðum sem ekki mátti handskrifa…

Ég valdi stærðfræði og líffræði sem aðalfög í KHÍ og var það kennarinn í stærðfræðinni (Anna Kristjánsdóttir) sem vakti áhuga minn á tölvum almennt. Hún lét okkur læra að nota tölvupóst í gegnum unix skel og sendi okkur reglulega tilkynningar. Á svipuðum tíma kynnist ég irkinu sem var líka í skel og þá opnaðist fyrir mér alveg nýr heimur. Netið og allt sem tengist því og tölvum heillaði mig. Ég valdi öll þau valfög í KHÍ sem ég gat er tengdust tölvum og netinu á einhvern hátt. Eitt af þeim var heimasíðugerð (með html ritli) sem Salvör Gissurardóttir kenndi.

Tölvukennsla og vinna hjá menntanetinu

Á síðasta árinu í KHÍ byrjaði ég að kenna á tölvur í Ísaksskóla. Á svipuðum tíma sá ég auglýsta stöðu hjá Íslenska menntanetinu sem fólst í því að aðstoða fólk sem átti í vandræðum með að tengjast netinu. Það eina sem ég kunni var það sem ég hafði lært við að tengjast Netinu heima, en samt hikaði ég ekki við að sækja um og fékk stöðuna. Ég kunni rosalega vel við mig hjá Ísmennt og var í skýjunum yfir að vinna við tölvur og Netið.

Ég kláraði KHÍ vorið 1997 og sem lokaverkefni gerði ég heimasíðu fyrir líffræðivalið innan KHÍ. Ég er núna í tölvunarfræði við Háskóla Íslands og lýk því námi núna árið 2000.

Frítíminn

Mestum hluta míns frítíma eyði ég fyrir framan tölvuna. Ef ég þarf að tala við systkini mín eða vini þá sendi ég þeim frekar tölvupóst en að hringja. Ef ég þarf að vita e-ð eða spyrja einhvern þá er Netið yfirleitt fljótlegasta leiðin og nýti ég mér það.

Fjölskyldan

Foreldrar mínir höfðu áhyggur af mér þegar ég byrjaði að nota Netið. Ég var á netinu um 8 tíma á dag..og símreikningurinn hækkaði... En þessi fíkn stóð yfir í stuttan tíma og núna er notkun mín á Netinu mun markvissari, þó svo að ég eyði miklum tíma fyrir framan tölvuna almennt.

Framtíðarsýn

Framtíðin er björt og spennandi og á eftir að koma "endalaust" á óvart. Ég ætla að fara að vinna þar sem tölvunarfræðinámið nýtist mér en það væri óskandi ef ég gæti einnig nýtt þekkingu mína á kennslusviðinu í þessari vinnu.

Vefslóð

Gyða Guðjónsdóttir   www.gyda.net