Ég er 31 árs og bý ein með dóttur minni sem er 6 ára. Ég er á 2. ári í Háskólanum í Reykjavík á tölvunarfræðibraut og útskrifast í vor sem kerfisfræðingur. Ég er stúdent af tungumálabraut Fjölbrautaskólans í Garðabæ. Þótt ég væri á tungumálabraut þá tók ég sem flesta valáfanga í stærðfræði og þá tölvunarfræðiáfanga sem voru í boði því mér fannst þessir áfangar mjög skemmtilegir. Þar sem ég hef alltaf haft áhuga á tölvum, tækjum og tækni hefur það verið augljóst að ég myndi mennta mig í einhverju fagi því tengdu.

Ég byrjaði m.a.í flugnámi og ætlaði í rafvirkjun, en fann mig ekki í þessum greinum. Mig langaði samt alltaf í tölvunarfræðinámið en treysti mér ekki því ég taldi það of erfitt. Ég ákvað að prófa að sækja um kerfisfræðinám og þar sem þetta er 2 ára hnitmiðað nám fannst mér það gæti hæft mér frekar en lengra nám. Atvinnuhorfur eru enda mjög góðar og góð laun í boði að loknu námi.

Ég hóf nám haustið 1998 og eins og ég bjóst við er þetta nám mjög skemmtilegt og áhugavert - ég finn mig vel í þessu námi. Það hentar alveg jafnt stelpum sem strákum. Það er samt strembið og tímafrekt, margar helgar og kvöld hafa farið í lærdóm og hefur þetta því tekið mestallan tíma minn undanfarin tvö ár. Semsagt ekki fjölskylduvænt nám - enda hefur dóttir mín eytt miklum tíma hjá skyldmennum þennan tíma. Þar sem mér líkar vel í þessu námi hef ég hugsað mér að fara í framhaldsnám og klára 3. námsárið. Að því loknu öðlast ég B.S. gráðu í tölvunarfræði. Ég er því mjög ánægð að hafa farið í þetta nám og ráðlegg öðrum sem áhuga hafa á þessum fræðum að sækja um nám í tölvunarfræði.

Það er margt hægt ef viljinn er fyrir hendi!