Sigrún Gunnarsdóttir vinnur hjá rannsóknardeild Landssíma Íslands. Hennar sérsvið er notkun upplýsingatækni við nám. Hún lauk meistaragráðu í tölvunarfæðum vorið 1995 og hefur starfað við hugbúnaðargerð og rannsóknarvinnu tengdri fjarskipta- og upplýsingatækni.

Menntun

Fyrstu sex árin bjó ég í Danmörku en fluttist síðan til Reykjavíkur. Leið mín lá í Menntaskólann við Sund og þar kynntist ég fyrst tölvum og forrritun. Reyndar bjó ég svo vel að faðir minn keypti tölvu á heimilið, Apple IIe, þegar ég var í menntaskóla og ég fékk strax áhuga á þessu tæki. Ég hafði reyndar aldrei neitt voðalega gaman af tölvuleikjum en það var svo margt annað sem heillaði mig. Það að vélin gæti heilsað mér með nafni þegar ég kveikti á henni fannst mér nokkuð áhugavert, ég hafði reyndar þurft að skrifa smá forrit til þess að vélin væri svona vingjarnleg en það var áhugaverði hlutinn.

Ég tók mitt fyrsta námskeið í forritun á fjórða ári í menntaskóla, í þá daga var forritun valfag og aðeins forvitnir nemendur sóttust eftir að komast í þetta námskeið. Eftir þá reynslu var ekki spurning um hvaða fag ég ætlaði að velja þegar í háskólann væri komið. Ég lauk B.S. prófi frá Háskóla Íslands vorið 1995. Um sumarið fór ég svo sem skiptinemandi til Frakklands og vann við tölvudeild Háskóla í Douai, Ecole de Mines de Douai. Þar kynntist ég tölvunarfæðinemum frá hinum ýmsu löndum ásamt því að læra að skrifa hugbúnað á frönsku. Mjög gagnlegt ! Þegar heim var komið hóf ég svo störf hjá tölvudeild ríkisspítala, þar fólst vinna mín í greiningu, hönnun og forritun á hugbúnaði sem tengdist starfsmannahaldi. Það hafði alltaf blundað í mér áhugi fyrir kennslu þanning að um haustið tók ég einnig að mér 30 % kennslu í Verslunarskóla Íslands til viðbótar þeirri vinnu sem ég vann hjá ríkisspítölum. Þessi aukavinna mín kenndi mér að ég átti margt ólært enn og það má segja að áhugi minn á að læra meira um kennslufræði og hvernig hægt væri að nota tölvur sem aðstoðartæki við nám hafi kviknað við þessa reynslu.

Eftir að hafa starfað á Íslandi í ár þá skelltum við hjónin okkur í framhaldsnám til Purdue University í Indina, Bandaríkjunum. Þar lá leið mín í kennslufræði í nám sem kallast “Educational Technology”. Ég lauk M.S. gráðu frá Purdue í desember 1991 og þaðan lá leið mín til Kaliforníu. Þar hóf ég meistaranám í tölvunarfræðum við University of Californina, Irvine, og vann með prófessor sem heitir Alfred Bork, en hann er einn af brautryðjendum hönnuða kennsluhugbúnaðar. Ég hef enn heilmikil samskipti við Alfred og erum við þessa dagana að skrifa bók sem fjallar um byltingarkenndar hugmyndir okkar um notkun upplýsingatækni í námi.

Verkefnistjóri hjá Rannsóknardeild Landsíma Íslands

Ég fluttist heim árið 1995 og þá var uppsveiflan í atvinnulífinu rétt að byrja. Ég starfaði fyrstu þrjú árin hjá Streng hf við viðskiptaforritun og um haustið 1998 hóf ég svo störf hjá rannsóknardeild Landssíma Íslands.

Þessi tæp tvö ár sem ég hef verið hjá Landssímanum hafa verið mjög skemmtileg. Ég er þátttakandi í nokkrum mjög áhugaverðum verkefnum sem tengjast notkun upplýsingatækni við nám sem og fjarvinnu, þ.e. kanna hver séu lífsgæði starfsmanna sem starfa í fjarvinnu. Ég starfa sjálf að hluta til í fjarvinnu og hentar það mér og fjölskyldu minni mjög vel þar sem ég er með tvo unga stráka og mann sem ferðast töluvert vegna vinnu sinnar. “Venjulegur vinnudagur” er hugtak sem ég þekki eiginlega ekki, því enginn dagur er eins. Ég starfa í verkefnastjórn þriggja verkefna og í tengslum við það er töluvert um fundi og ferðalög. Ég starfa einnig sem starfsmaður í þessum verkefnum sem felst í forritun, vefgerð, uppsetningu búnaður, upplýsingaöflun o.s.frv. Ég nota heilmikið símann, tölvupóstinn og fjarfundabúnað til samskipta innan þessa verkefna sem og tilraunast með þessi tæki og tól í hinum ýmsu verkefnum. Ég er töluverður netverji því ég reiði mig allmikið á Netið og þær upplýsingar og samskipti sem hef í gegnum það. Notkun fjarskipta- og upplýsingatækni er stór hluti af mínu daglega lífi og ég þyrfti að breyta ansi miklu ef ég hefði ekki aðgang að þessum miðli.

Ég starfa einnig sem matsmaður hjá Evrópusambandinu, sem felst í því að fara yfir verkefnatillögur sem og að fylgja eftir verkefnum sem eru í gangi. Það gefur manni heilmikla innsýn í hvað er að gerast rannsóknarheiminum að vinna sem matsmaður hjá Evrópusambandinu og maður eignast einnig kunningja um alla Evrópu sem eru að fást við samskonar störf og maður sjálfur.

Ég hvet allar þær ungu konur sem hafa áhuga að hefja nám í tölvunarfræðum að íhuga þann kost gaumgæfilega því að grunnmenntun á upplýsingatækninni er góður grunnur til þess að byggja á hvað svo sem ætlunin er að gera í framtíðinni.

Vefslóð

Rannsóknardeild Landsíma Íslands