Radíókeppni

Radíóamatörar halda keppni, og fleiri en eina, um hverja helgi ársins. Markmiðið er venjulega að hafa sem flest sambönd og við stövar í sem flestum löndum eða á tilteknum svæðum innan tiltekinna tímamarka. Gefnir eru "punktar" fyrir hvert samband, oft mismargir eftir því hvort stöðvarnar séu í sama landi eða heimsálfu, og að auki "margfaldarar", sem oft eru gefnir fyrir fyrsta samband í hverju landi eða með öðrum hætti. Til þess að ná árangri þarf margt að fylgjast að - góður tækjabúnaður, góð loftnet, færni, harði og þekking á fjarskiptaskilyrðum sem kemur sér vel við skipulagningu þátttökunnar. Þá er tímalengd hverrar keppni misjöfn. Í þeim lengstu er hún allt að 48 klst. og þeir sem hafa úthald og tíma ná að sjálfsögðu yfirleitt betri árangri en hinir sem verða að takmarka þátttöku sína.

Keppnisþátttaka er eitt þeirra sviða sem ég stunda mikið, enda mjög spennandi og skemmtileg. Þótt á brattan sé að sækja gegn "stóru" stöðvunum erlendis, sem hafa meira afl, skóga af loftnetum og njóta jafnan betri fjarskiptaskilyrða fjarri norðurljósabeltum, þá er alltaf hægt að setja sér markmið um að bæta fyrri árangur eða t.d. ná flestum stigum á Norðurlöndum. Niðurstöðurnar eru sendar þeim sem halda hverja keppni og veittar eru viðurkenningar fyrir árangur. Ennfremur senda menn oft líka niðurstöðurnar á vefinn 3830 (sem dregur nafn sitt af tíðninni 3830 KHz, þar sem amatörar í Bandaríkjunum skiptast á upplýsingum um árangur sinn) og fá þar fyrsta samanburð, þar til endanleg úrslit liggja fyrir.

Væntanlegir keppnisviðburðir

Dagatal keppnisviðburða má finna víða á netinu, sbr. vefsíðu SM3CER, en hér eru nokkrir framundan sem verið getur að ég taki þátt í.

Árangur TF3KX í nýlegum keppnisviðburðum

JARTS WW RTTY keppnin, 18-19. október 2004
Haldin af japanska radíóamatörafélaginu, JARTS.
Margfaldarar gefnir fyrir hvert land og ríki/fylki.

Heildartími í keppninni: 10 klst.
Heildarstig: 102.000
Sæti: 31 af 59 í "low power" flokki (skv. 3830)

CQWW-RTTY keppnin, 25-26. september 2004
Haldin af tímaritinu CQ - ein stærsta RTTY keppni ársins.
Margfaldarar gefnir fyrir hvert land, ríki/fylki og "CQ-zone".

Heildartími í keppninni: 17 klst.
Heildarstig: 293.986
Sæti: 15 af 28 í "low power" flokki (skv. 3830)

SAC-CW keppnin, 18-19. september 2004
Haldin af norrænum radíófélögum.
Margfaldarar gefnir fyrir hvert land sem haft er samband við.

Heildartími í keppninni: 10 klst.
Heildarstig: 88.704
Sæti: 8 af 18 í "low power" flokki (skv. 3830)

Russian RTTY keppnin, 4. september 2004
Haldin af rússneskum amatörum.
Margfaldarar gefnir fyrir hvert hérað eða "oblast" í Rússlandi.

Heildartími í keppninni: 6 klst.
Heildarstig: 130.475
Sæti: 6 af 20 í "low power" flokki (skv. 3830)

SARTG RTTY keppnin, 21-22. ágúst 2004
Haldin af "Scandinavian Amateur Radio Teleprinter Group"
Margfaldari gefinn fyrir hvert land sem haft er samband við.

Heildartími í keppninni: 13 klst.
Heildarstig: 349.685
Sæti: 16 af 40 í "low power" flokki (skv. 3830)