Fjarskiptatæki

Fjarskiptatæki min eru:

• Icom IC746 sendiviðtæki, sem gefur 100 W sendiafl. Þetta er tækið sem ég nota mest fyrir fjarskipti frá 160 m tíðnisviðinu til 10 m. Tækið má líka nota á 6 m og 2 m tíðnisviðunum, en ef frá er talin stöku hlustun nota ég þau ekki. Ég hef bætt 500 Hz kristalsíu frá International Radio í tækið, sem kemur sér vel þegar tíðnirnar eru þétt setnar.
  
  
• SW20+ heimasmiðað ("kit") sendiviðtæki frá Small Wonder Labs. Tækið, sem gefur 1-2 W sendiafl á 20 m tíðnisviðinu, hefur VFO tíðnistýringu, "superhet" móttakara með kristalsíu og dregur aðeins 16 mA í hlustun. Þetta er tæki sem ég get hiklaust mælt með sem ferðatæki eða fyrir þá sem vilja koma sér upp fjarskiptabúnaði með sem minnstum tilkostnaði. Tíu AA-rafhlöður duga mér til í tækinu mánuðum saman.
  .
  
• ZM-2 loftnetaaðlögun ("tuner") frá Emtech, fyrir lágt afl (QRP). Þetta er lítið tæki sem ég pakka niður með SW20+ tækinu, ásamt öðrum fylgihlutum, og tek með mér í ferðalög.
  
  

  SW20 sendiviðtækið ofan við radíódagbókina og Emtech loftnetsrásin hægra megin. Allur búnaðurinn, að meðtöldum loftnetsvír, kemst fyrir í litlu veski. Með þessari fullbúnu ferðastöð nást oftast sambönd um þúsundir kílómetra

Loftnet

Eins og margir sem búa í þéttbýli á ég ekki auðvelt með að koma fyrir miklum loftnetabúnaði. Ég bý í tvíbýli í eldra húsi í miðbæ Hafnarfjarðar, þar sem ég hef radíóherbergið á háaloftinu og þaðan kemst ég auðveldlega um glugga út á járnþakið. Skásta fyrirkomulag loftneta hjá mér, og það sem helzt næst samþykki fyrir hjá nágrönnum, er að hafa loftnetin á þaki hússins. Loftnetin eru núna:

Lóðrétta 6 m loftnetsstöngin, ásamt V-loftnetinu (vírarnir eru teiknaðir rauðir á myndina).

• "Inverted-V", sem kóaxkapall (50 Ohm) fæðir gegnum 4:1 "balun". Þetta loftnet er mín hönnun, annar leggurinn er 8 m langur og hinn er 12 m. Með þessum lengdum er loftnetið nærri resónans á 7, 14, 21 og 28 MHz og mældar standbylgjutölur eru sem hér segir:

  7,050 MHz 14,100 MHz 21,100 MHz 28,100 MHz

  SWR = 4,8 SWR = 1,5 SWR = 1,7 SWR = 1,4

  V-loftnetið er borið uppi af 6 m langri álstöng sem reist er við skorstein hússins og gengur gegnum sjónvarpsloftnetið, sem báðar íbúðir hússins nota. Kóaxkapall er þræddur gegnum stöngina og upp úr efri endanum, þar sem hann tengist "balun" spenninum. Hornið mili víranna er nokkuð krappt, eða um 90 gráður, sem takmarkast af stærð þaksins. Vírarnir stefna í norður og suður og útgeislun er því nokkuð góð í austur og vestur.

  Nærmynd af "balun" tengingunni.

  Um tíma átti ég í vandræðum með sjónvarpstruflanir vegna nálægðar við sjónvarpsloftnetið og gat því lítið verið í loftinu. Með síum og "einangrurum" ("ground breakers") á inntak sjónvarpsloftnetsins tókst mér að minnka truflanir verulega, en með því að nota "balun" á V-loftnetið tókst mér loks að losna við allar truflanir. Síðan hef ég örbylgjuvætt húsið og þar ber ekki heldur á truflunum.

• Lóðrétt stöng, sem ég nota einkum á 80 m og 160 m tíðnisviðunum. Þetta er 6 m langa stöngin sem heldur uppi V-loftnetinu og á móti henni fæði ég í bárujárnsþakið, sem var endurnýjað haustið 2003. Ekki þarf stóra spólu til þess að ná resónans á 80 m og olli það nokkrum heilabrotum í upphafi. Trúlegast er þó ástæðan sú að rýmd milli álstangarinnar og kóaxkapalsins upp í V-loftnetið sé svo mikil að talsvert af RF afli nái inn í V-loftnetið, sem virkar þá sem viðbót við stöngina. Annað, sem kom mér í fyrstu á óvart, var að loftnetsstöngin er í nánast öllum tilvikum umtalsvert lakara loftnet á 40-10m en V-loftnetið. Hugsanlega er hér aftur um að ræða óbein tenging stangarinnar við V-loftnetið. Þetta á ég eftir að sannreyna frekar með hermunum í EZNEC og mælingum á loftnetunum..