Byggðasafn Húnvetninga og Strandamanna - Reykjum í Hrútafirði -

Nýjustu fréttir Á döfinni Hákarlaveiða- sýning Byggðasafns- sýning Myndir Saga safnsins Safnstarfið Merkar minjar Greinar Aðalsíða

Saga safnsins Byggðasafn Húnvetninga og Strandamanna var formlega vígt og opnað til sýningar þann 9. júlí 1967. Það voru einstaklingar innan áttahagafélaga Húnvetninga og Strandamanna í Reykjavík og áhugasamir heimamenn sem unnu að stofnun þess á sjötta og sjöunda áratugnum. Staðarvalið var engin tilviljun, enda hafði þá verið reistur á vegum Þjóðminjasafnsins skáli yfir hákarlaskipið Ófeig á Reykjatanga. Ófeigsskáli reis árið 1961 og í kjölfarið náðist samstaða um að Stranda- og Húnavatnssýslurnar tvær stofnuðu sameiginlega eitt byggðasafn yfir muni sína og minjar sem reist yrði við hlið Ófeigsskála.  Þegar safnið opnaði árið 1967 var það eitt best búna safn landsins. Nokkuð var lagt upp úr nýjungum en á safninu var endurbyggð stofa frá Svínavatni í Austur-Húnavatnssýslu og baðstofa frá Syðstahvammi á Vatnsnesi. Þetta var í eitt fyrsta sinn hérlendis sem heilu byggingahlutarnir voru reistir innandyra.  Fyrsti safnvörður sem ráðinn var að safninu í fast starf var Jón Haukdal Kristjánsson árið 1993. Fram að því var starfsfólk aðeins ráðið að safninu yfir sumartímann, en formaður safnstjórnar á hverjum tíma hafði yfirumsjón með málefnum safnsins. Eigendur safnsins eru Húnaþing vestra og héraðsnefndir Strandasýslu og Austur-Húnvetninga, hvert að einum þriðja hluta. Safnið er sameign eigenda og eru gripir þess óskiptir og skráðir sameiginlega. Stjórn safnsins er í höndum þriggja manna sem eru tilnefndir af eigendum. Stjórnin hefur allar mannaráðningar með höndum, þar á meðal forstöðumanns og gerir fjárhags- og rekstraráætlanir. Aðalbygging safnsins er 346 fermetra steinsteypt bygging, reist á Reykjatanga á árunum 1962-66 og 172 fermetra stækkun til suðurs sem lokið var við árið 1986. Byggingin er að stærstum hluta einn salur, steinveggur skilur að viðbyggingu en opið er á milli. Salerni og aðstaða safnvarðar er í aðalbyggingu við inngang. Þar yfir, í hluta af risi, eru núverandi geymslur safnsins. Inngangur í safnið er í tengibyggingu sem er úr aðalbyggingu í Ófeigsskála. Byggðasafnið hefur Ófeigsskála til afnota til sýninga á sjóminjum safnsins. Að auki hefur safnið afnot af gamalli hlöðu á Söndum í Miðfirði og er hún notuð sem geymsla fyrir stærri muni safnsins. Fyrsti forstöðumaður í fullu starfi var Pétur Jónsson frá Súluvöllum á Vatnsnesi. Var hann við störf frá 2000 – 2007.

Strandasýsla Húnaþing vestra Austur- Húnavatnssýsla

Byggðasafn Húnvetninga og Strandamanna Sími: 451-0040 og 863-4287 ¤ Netfang: byggdasafn@emax.is © 2001 Vefsíðugerð: Sögusmiðjan ¤ Umsjón: Byggðasafnið að Reykjum