Sú nýlunda sem við höfum verið að tileinka okkur hjá Skógræktarfélagi Stykkishólms varðandi gönguleiðir er að merkja sérstaklega þær leiðir sem ríðandi menn á hestum mega fara um á skógræktarsvæðunum. Merkin eru í sjálfu sér einföld  grænn hestur táknar að heimilt sé að ríða um svæðið en rauður hestur táknar að óheimilt sé að ríða um svæðið. Viðeigandi merki eru skrúfuð á stikurnar við byrjun  göngu- og eða reiðleiðar. Fyrstu merkin hafa verið sett upp í Grensás rétt ofan við Stykkishólm. Enn sem komið er, er aðeins um eina merkta leið að ræða þar, það er niður að svokölluðum Þröskuldum og eða til baka. Varðandi göngu og reiðleiðir um Grensás verður bætt við leiðum á næsta sumri og er stefnt að því að hægt verði að ríða inn að Vík og  til baka. Til að forðast allan misskilnin þá eru að sjálfsögðu allar aðalleiðir þ.e. akvegir og slóðar að skógræktarsvæðunum í sjálfu sér reiðleiðir.  En að sama skapi er bannað að fara um skógræktarsvæðin á hestum nema þar sem græni hesturinn er.  Við skógræktarmenn í Stykkishólmi höfum getað státað okkur af því að hafa góða samvinnu við hestamenn. Til marks um það opnuðum við síðastliðið sumar reiðleið í gegn um skógræktarsvæðið í Tíðás sem tengist svo reiðvegi báðumegin við. Ennþá er þó óheimilt að ríða um svæðið nema eina leið, eftir gamla þjóðveginum. Fyrirhugað er að bæta við reiðleiðum þar á næsta sumri. En af hverju að merkja sérstaklega göngu- og eða reiðleiðir?  Ástæðan er sú að það er verið að ræka upp landið með aðferð sem nefnd hefur verið skógrækt. Það er af og frá að ríðandi maður sjái plöntur fyrr en þær eru orðnar nokkurra ára gamlar. Það segir sig sjálft að ríðandi maður á hesti getur skemmt tugi ef ekki hundruðir plantna í smá skoðunarferð inn á skógræktarsvæðin. Þetta á einnig við um gangandi fólk. Það er að færast í vöxt að sett eru upp “gerði” fyrir hesta nálægt áningastöðum á skógræktarsvæðum. Til að vera í takt við tímann höfum boðið hestamönnum í Stykkishólmi að setja upp gerði á tveimur stöðum á skógræktarsvæðinu í Sauraskógi, í Langás og Setbergi tengdum áningastöðum, þar sem grill, bekkir og borð eru fyrir hendi. Gerðin þurfa þó að vera í nokkurri fjarlægð frá áningastaðum þ.e. borði og bekkjum vegna þess að reikna má með að upp komi vandamál í sambandi við flugur sem  sækja að áningastöðunum. Eins og margir vita eru flugur eitt það hvimleiðasta sem við glímum við á áningastöðum.
   Trausti Tryggvason